مذكرات مواطن مفروس في بلاد المريخ

أعيش في أحدي المدن الجميلة .. من زمان ونفسي أكلمكم عن بلدي الرائعة التي أحبها من كل قلبي.. بلدي تسمي المريخ - هنا أحب ألفت نظر حضراتكم لحاجة مهمة أوي - وهي أن المريخ دي غير المريخ التانية - المهم .. بلدي المريخ مساحتها 1 مليون كيلو متر مربع .. الشئ اللي بأتعجب له .. إني من يوم ما وعيت علي الدنيا وأنا بأسمع في التليفزيون : عاوزينها تبقي خضرا .. والي الأن كل ما أبص في الخريطة الاقيها لسة صفرا

الزعيم - وكلمة الزعيم إذا نظرت اليها في أي معجم كمعجم البحر المالح مثلاً - وده غير البحر المحيط بتاع بن منظور - فهي لا تطلق إلا اذا كان زعيم عصابة مثلا .. زي مشرط اللي كان في بكار لو فاكرين معايا .. حظي بقي أنا ان السنة اللي صعد فيها زعيم المريخ الي كرسي الحكم هي نفسها السنة اللي شرفت فيها انا إلي هذه الحياة .. ومن ساعتها والله ياجماعة ما راضي ينزل .. الظاهر انه حالف يمين طلاق .. وهو يعني هايكون فلتة .. لو راجعتوا أي بلد من البلاد التي تتبع المجموعة التي تسير فيها المريخ لن تجدوا - وأتحداكم - كلمة زعيم سابق أبداً .. اللهم إلا زعيم راحل .. يعني الظاهر انه حالف يمين ما ينزل الا علي النعش .. وتعرفوا اليمين طبعا مش سهل .. وما يخلصكمش انه يصوم 3 أيامشعب المريخ يستحق جائزة نوفل علي صبره وتحمله .. والله لا أجد له مثلا إلا كالجمل هو صحيح عليه جزء كبير وقال : يافرعون من فرعنك قال : ما لقتش حد يلمني -

فرعون هو أحد زعماء المريخ القدامى - كتير بيصّبروا نفسهم ويقولوا ان الزعيم مش عارف اللي بيجري في المريخ .. وإن العصابة اللي حواليه هما اللي وحشين وبيفهموه إن كل شئ تمام .. وليس في الامكان أفضل ولا أبدع ولا أجمل مما كان .. إلي آخر هذه الكلمات التي تطرب لها آذان سعادته .. أتذكر الأن بيت شعر جميل - ومن فضلكم ما تفهمونيش غلط ياجماعة - إن كنت تدري فتلك مصيبة وإن كنت لا تدري فالمصيبة أكبر

تصوروا إن اسم زعيم بلدي المريخ مذكور في القرآن .. أيوة .. مش مصدقني .. هذا ما أكتشفه أحد القراء في أحدي المناسبات الدينية والذي يحضره الزعيم .. ويتسلم مصحف في علبة قطيفة حمرا .. ويفتح العلبة ويوطي علي المصحف يبوسه كأنه عثمان بن عفان .. المهم لو مش مصدقيني أفتحوا المصحف : سورة الأنعام : آية : 155 بعد أول ثلاث كلمات .. وحسبي الله ونعم الوكيل

صحيح ياجماعة إن الزن علي الودان أمر من السحر .. وكله تمام يافندم .. بس المفروض الفندم ده طالما رضي انه يبقي أفندم انه يشوف فعلا كله تمام ولا لأ : لذلك أنا مع اللي يقولوا انه عارف بس مطنش

أتذكر إن عمر بن عبد العزيز كان ينتقي جلساؤه رضي الله عنه .. لكن الأن ما فيش غير كله تمام يافندم .. وأول ضربة جوية فتحت باب الحرية .. فأختصروا باب الحرية في أول ضربة جوية .. وحقيقي الكلمات دي لها قصة .. وهي انه كان في حرب بين بلدي المريخ وبين بلد آخر يسمي بلوتو - وطبعا مش لازم أقول إن بلوتو ده غير بلوتو اللي في بالكم - المهم .. الزعيم ساعتها كان لسة ما بقاش زعيم .. يعني كان لسة ما لبسش العمة .. كان قائد القوات الجوية لبلاد المريخ .. وممكن أصلا ساعتها كان نايم في بيتهم .. يعني هو أصلاً ما ركبش طيارة ولا شاف السماء من أصله .. بس برضه .. أول ضربة جوية فتحت باب الحرية .. حرية كمان وكمان >> إديها كمان حرية

في بلدي المريخ ممكن تكون ماشي في أمان الله أو حتي راكب ميكروباص وتلاقي اللي يوقفك أو ينزلك من العربية ويديك بالشلوت-صراحة مش عارف هي الشلوت ولا الشلوط-ويقولك اركب..وممكن الموضوع يتطور وتوصل في الآخر انك انت زعيم تنظيم القاعدة المريخي .. ده كله لأن مزاج ساعة الباشا مش رايق .. وممكن يكون شكلك مش عاجبه

العسس في المريخ له دور رئيسي ومركزي - لا تربطوا كلمة مركزي بالأمن المركزي ويؤدي ذلك الي استفسارات واستنتاجات مش عاوزينها - فالزعيم يعتقد انه لازم يكتم علي نفس اي حد يفكر انه ياخد نفسه .. لذلك فالعسس هو الوحيد الذي يستطيع أن يثبت أركان حكم الزعيم في المريخ .. مش مشكلة في كل اللي فات .. مشكلتي الكبيرة في الدنيا دي كلها بقي .. ان اسمي علي اسم رئيس العسس في المريخ .. وهو ما يسبب لي حالة من الاحساس المستمر بالذنب .. وأفكر جدياً في هذه الأيام جدياً بالتوجه الي الشهر العقاري بالمريخ لتغيير اسمي من حبيب الي اي اسم تاني ان شاء الله كوالالمبور حتى

انجازات كتيررررررررر ياجماعة تحققت في العهد الذهبي المشرق للزعيم .. شباب بالملايين قاعدين علي القهاوي المريخية مش لاقيين شغل .. دكاترة ومهندسين وربي وربي شغالين زبالين .. بس في حاجة محيراني ياجماعة وهو حب الزعيم للكباري .. بجد الانجازات كلها كباري في كباري .. كل كام يوم كوبري جديد .. ده ممكن يهدوا كوبري ويبنوه من جديد علشان يفتتحه الزعيم .. تصدقوا ياجماعة مرة كانوا بيفتحوا كوبري في المنطقة اللي عايش فيها وكنت انا خارج رايح الكلية - مش عارف هاتصدقوني ولا ايه - حسيت اني مش في المريخ .. بجد .. ايه النظافة دي !! ايه الشجر ده !! .. طلع امتي ؟ .. بقيت باكلم نفسي وأضرب كف علي كف .. سألت قالوا : ده كوبري جديد بيفتحوه .. المهم رحت الكلية .. وأنا راجع لقيت كل شئ رجع زي ما كان .. الشجر انشال .. اخدت نفس عميق وحمدت ربنا .. بصراحة ياجماعة أنا كنت خايف وأنا راجع أتوه لو استمر الوضع بتاع الصبح ده .. قلت أيوة .. هي دي المريخ اللي أعرفها

المهم .. هذه مذكرات مواطن مفروس في بلاد المريخ .. وإن شاء الله سيأتي اليوم الذي تشرق فيه الشمس على المريخ ويسطع النور

ـ ( وَيَقُولُونَ مَتَى هُوَ قُلْ عَسَى أَن يَكُونَ قَرِيباً [الإسراء : 51] ـ