2009-02-01

مواقف طريفة حدثت لي (1) خلوا بالكوا من جزمكوا

بسم الله والصلاة والسلام على رسول الله صلى الله عليه وسلم .. أحببت في وسط تلك المشاكل وهذي الهموم أن أذكربعض المواقف الطريفة التي حدثت لي .. من باب قول الرسول الكريم صلى الله عليه وسلم ( وأحب الأعمال إلى الله سرور تدخله على مسلم ) صحيح الجامع 176 .. واسمحوا لي أن أكتب بالعامية حتى أعبر عن الموقف كما حدث .. أسأل الله أن تملأ السعادة قلوب المسلمين يارب العالمين


الموقف الأول





كنت في الكلية في يوم من الأيام .. خلصت ومروح قرب العصر كده .. الكلية كانت في جاردن سيتي .. علشان أروح إما إني أركب المترو من محطة أنور السادات أو من محطة السيدة زينب .. في اليوم ده قررت أركب من محطة السيدة زينب

العصر أذن عليا في الطريق .. كنت ساعتها عديت القصر العيني وكان في مسجد في الشارع اللي بيطلع على المترو قلت أصلي الأول وبعدين أركب المترو .. دخلت المسجد .. خلعت الحذاء – أعزكم الله – وكان كوتشي لسة جديد لانج وحطيته على الرف بتاع الأحذية في آخر المسجد

أقاموا الصلاة .. الإمام واقف بيسوي الصفوف : استقيموا واستووا واللي معاه موبايل يقفله وكل واحد يخلي باله من حاجته وإدارة المسجد غير مسئولة عن أي حاجة – الإمام زمان كان بيقول استقيموا واستووا .. دلوقتي محتاج يقول قصيدة طويلة قبل الصلاة – المهم أنا قلت في نفسي : آه ربنا يستر على الكوتشي .. بس أنا في الصف الأول هأرجع ورا علشان كوتشي يعني

صلينا وقمت بقى علشان أستكمل طريقي المفروش بالورود والزحمة والزق وكتف من هنا وكتف من هناك داخل المترو .. رحت علشان آخد الكوتشي إلا وما فيش كوتش :) دور ياعم .. هنا هنا .. ما فيش .. والمشكلة مش أنا بس .. لا .. كان معايا واحد تاني .. استسلمت للأمر الواقع وقلت آخد شبشب من الحمام وخلاص .. وأنا بأتخيل نفسي بقى .. واحد لابس شيك على شبشب حمام :)

المهم .. الراجل التاني .. شريكي في السرقة ( طبعا إحنا اللي اتسرقنا مش العكس ) كان ساكن قريب من المسجد .. صعبت عليه .. قالي استنى وراح جابلي " جزمة " من البيت أروح بيها – جزاه الله خير – هي صحيح ما كانتش لايقة على الهدوم بس معلش :)

المهم روحت البيت لا جبتلهم سيرة ولا خبر وكتمت على الموضوع .. بعد كده واحد علمني حيلة كويسة .. إني لما أجي أدخل مسجد أحط فردة في ناحية والفردة التانية في ناحية بعيدة .. الحرامي طبعا مش هاياخد فردة واحدة ههههههههه ومع ذلك ما فيش فايدة برضه بعدها اتسرقت والمشكلة الحذاء كان جنبي بالضبط بس مش عارف اتاخد أزاي



ملاحظة :-


اللي بيجيله قلب يسرق حاجة من بيت ربنا أكيد انسان فاقد الأمل في كل شئ .. تخيلوا الحرامي اللي بيسرق الأحذية من المساجد ده بيروح يبيعها علشان يشتري علبة سجاير أو أي من البلاوي التانية .. والموضوع منتشر .. ونصيحة للأخ حرامي الأحذية هدي اللعب شوية .. ويأخي ابقى سيب حذاء قديم بدل اللي أخدته حتى .. بدل ما نروح حافيين



وأخيرا .. خلوا بالكوا من جزمكوا :)



ونستكمل مع موقف آخر إن شاء الله .. قريباً

47 التعليقات:

مهندس مصري يقول...

ما هي دي بقت القاعدة العامة في كل مساجد مصر
لدرجة أنا كنت مستغرب هنا في مساجد السعودية إن الناس بتقلع جزمها و تسيبها على باب الجامع عادي جداً

كيــــــــــــارا يقول...

هههههههههههههه طيب كويس انه شوذ بس اللي اتسرق

تعمل ايه بقي في اللي بتصلي وقدامها شنطتها وشويه كتب شارياها وبتسجد والحاجه قدامها مسافه مابتسلم وجايه تسبح وتاخدالحاجه اللى هي قدامهااااااااااا
مش قدام حد تاني وفص ملح وداب

موقفك ايه بقي ساعتها

مصروف الشهر ومصاريف كتب عشان البحث واشتراك وبطاقه وكل حاجه بقي

وشنطه كله هواااااااا

مش موجود طب ياريته كان شوذ بس

ماعلينا بس بجد بجد
الاستايل بجد تحفففففففه

(أم البنين) يقول...

والله مش في مصر بس
عمر إبني راح يصلي في العيد
وفرحان بالجزمة الجديدة
طلع مالقاهاش هو و مجموعة من الناس
الحرامي لم كمية كبيرة...
الظاهر مخطط للعيد من زمان
طبعا رجع برده بشبب حمام(شيك جدا)
...

حسن حنفى يقول...

هههههههههههههه

انا الموقف ده حصل معايا قبل كده بس في المسجد اللي جنب بيتنا وهو مسجد صغير حتي مش فيه حمام علشان اخد منه شبشب روحت البيت جري حافي

:d

نهر الحب يقول...

للاسف مشاكل السرقة من المساجد دى متكررة كتير جدا

محمد الدخاخنى يقول...

مشكلة تتكرر كثيراً..وأنا سرق منى "شبشبين"أعزك الله..لكن الخير أنى كنت اصلى بجوار بيتى

تحياتى..وكل سرقة وانت بخير وفداك1000"كوتشى"

تحياتى

أحمد سعيد بسيوني يقول...

بسم الله

يوم الخميس اللي فات اتصل علي زميلي في الكلية
كان عاوز جزمة عشان جزمته اتسرقت منه في صلاة الظهر
!!!!!!!!

بس سيبك
لما واحد يتمسك من الحرامية دول بياكل ضرب ماشافوش في حياته

اذكر مرة مسكوا حرامي بيسرق من الجامع وكأن الناس ماصدقت
كل اللي اتسرقت منه جزمة من عشر سنين فاتوا الا وجه وشارك في الضرب

دمتم

mahasen saber يقول...

حبيب معلش ليكى اجرالصبر وتعيش وتاخد ثواب غيره

انا بئه اعرف واحد كان كل ما يشترى جزمه ماركه معينه ويروح يصلى بيها تتسرق منه
مره والتانيه وبتبقى اول لابسه ونفس الماركه ونفس السرقه فى المسجد لدرجة انى قلتله غير الماركه

اما انا فى السجود ايام الكليه برفع راسى ملقتش الشنطه معرفش انا اليى امعنت السجود ولا الظروف ايه بس انا وصحباتى لقيناها فى الحمام معرفش دخلته لوحدها ولا بمساعده

فكرتنى بالذى مضى
اليى يسرق فى بيت ربنا ده اكيد اكيد قلبه ميت والعياذ بالله

mohamed ghalia يقول...

اكيد هناخد بلنا
دمت بكل الود اخى

ماما أمولة يقول...

ههههههههه

ربنا يكفينا الشر يارب

ويهدي كل عاصي اللهم امين

أحمد (زوج مخنوق سابقا ) يقول...

تعرف يا حبيب من كام يوم مسكوا حرامي جزم عندنا في المسجد اللي جنبنا
الراجل داخل المسجد اثناء الصلاة و جايب شيكارة و بيعبي الجزم من على الرف فيها بكل هدوء
ستر ربنا واحد داخل المسجد متأخر عن الجماعة شوية
لقاه بيعبي فيهم
طبعا عكشه من قفاه و و لغاية لما الناس خلصت صلاة
الكارثة انه طلع نصراني و من حلوان
يعني يا ابن الناس جاي من حلوان للزيتون علشان تسرق الجوامع؟؟
أكل كمية ضرب يا حبيب
الناس بقت تطلع فيع القديم و الجديد
بجد متخيل انهم لو كانوا مسكوا شارون و لا اولمرت ما كانوش ضربوه بالشكل ده

عموما ربنا يعوض عليك

عالم حبيب يقول...

مهندس مصري

الله المستعان .. تصدق برضه أنا أول ما جيت دبي وأول صلاة دخلت أصليها في المسجد خلعت الحذاء ومسكته في ايديا ودخلت بيه المسجد علشان احطه على الرف .. أخويا قالي : هو انت فاكر هنا زي مصر :) هنا أمام المسجد بتلاقي معرض أحذية .. ومع ذلك بتخرج تلاقي حذاؤك .. ربنا يسترها

عالم حبيب يقول...

كيارا

هههههههه يبقى لازم نغير العنوان الى خلوا بالكوا من كتبكوا .. جزاكم الله خير


أم البنين

حفظكم الله وحفظ البنين .. الله المستعان .. صح مش في مصر بس .. بس الموضوع منتشر أكثر في مصر والله المستعان

عالم حبيب يقول...

حسن حنفي

ههههه كويس انه كان جنب البيت

نهر الحب

صحيح المشكلة منتشرة كتير والله المستعان

عالم حبيب يقول...

محمد الدخاخني
الله يعوض عليك أخي الحبيب .. آه كده ..جنب البيت يبقى حرامي محترم بيراعي ظروف الناس .. هههه الله المستعان

عالم حبيب يقول...

أحمد سعيد بسيوني

ههههههه ورحتله بقى ولا قلتله خدلك شبشب حمام .. اله المستعان

آه بيقولك خد علقة ماخدهاش حرامي جزم في جامع

عالم حبيب يقول...

mahasen saber

اه لازم يغير الماركة .. بس أنا في كل الحالات اللي اتسرقت فيهم ما كانوش ماركات أوي يعني .. بس آخر واحدة كنت شاريها من أبو ظبي يجي ب حاجة وتلاتين درهم وكانت شيك أوي .. أكيد هو قال ناخد حاجة من بتاعة بلاد برة :)

عالم حبيب يقول...

mohamed ghalia

أيوة خلي بالكوا كفاية اللي اتسرقوا


ماما أمولة

اللهم آمين يارب .. جزاكم الله كل خير

عالم حبيب يقول...

أحمد (زوج مخنوق سابقا )

ايوة ما نا كنت هأقول إن في كتير من الحالات مش بيكونوا مسلمين علشان يكرهوا الناس في المساجد .. بس قلت علشان ما نعملش فتة بالملوخية .. أقصد فتنة طائفية :)

اللؤلؤة يقول...

اللام عليكم ورحمة الله و بركاته:
و الله يا أخى العزيز لقد هونت عليا بهذا البوست الجميل
فبارك الله فيك
و يسعدنى التواصل معك

أخـــ مسلمة ـــت يقول...

بتحصل في أحسن العائلات
حصلت لاختي مرة لكن في مسجد الكلية
واللي أخدت الحذاء كانت بنت محترمة سابتلها حذاء كعبه مكسور

الللي غايظني في الموضوع انه الحذاء كان بتاعي مش بتاع أختي

حسبنا الله ونعم الوكيل

لكن!
لا يلدغ المؤمن من جحر مرتين

تحياتي
جزاكم الله خيرا علي الزيارة والتعليق القيم

طالبه الفردوس يقول...

حسبى الله ونعم الوكيل

المشكله ان عند النساء كمان بتتسرق الاحزيه والموبايلات والحقائب

مانستغربش انه بيتم السرقه فى بيت ربنا لانها تتم فى مكه وعند الكعبه

ربنا يهديهم

عالم حبيب يقول...

اللؤلؤة

وعليكم السلام ورحمة الله وبركاته

بارك الله فيك أخي الكريم وهون الله أمرك والمسلمين


أخـــ مسلمة ـــت

ههههه الله يعوض عليكم .. جزاكم الله خير



طالبه الفردوس

الله المستعان وربنا يهدي

اللؤلؤة يقول...

السلام عليكم
أخى عالم حبيب :
شرفتنى بزيارتك لمدونتى وتعليقك الجميل فيها.وأحب أقول لك أنك ومدونتك خفيف الظل وربنا معاك فى الغربة
ويسعدنى التواصل معك

fashkool يقول...

ازيك يا حبيب .. شرفتنى ونورتنى
اولا : انا صلحت الآ’يه .. واى خطأ فى القرأن وجب له التصحيح .. حلوه التصحيح دى عشان ما تقولش صلحت غلط .. ههههه
ثنيا التانيه (انشاء الله) دى من الاستعجال على الكمبيوتر وحاصلحها هى كمان
ما علهش بقى علقه تفوت ولا حد يموت وابقى حط جزمتك قدامك وخد بالك منهها قوى وخصوصا الجزم دى اليومين دول ثروه
تحياتى

عالم حبيب يقول...

اللؤلؤة

وعليكم السلام ورحمة الله وبركاته

جزاك الله كل خير أخي الكريم ويسعدني التواصل معك دائما


fashkool

الله يكرمك يارب الوالد الكريم .. وجزاك الله خير على سعة صدرك .. وبجد مبسوط إن في حد من أعمار أباؤنا مهتم يكون في عالم التدوين وسط ابناؤه .. ربنا يكرمك وأتواصل مع حضرتك دائما على خير

الحرامي يقول...

والنعمه اللي حصلك ارحم من اللي حصلي
شوف رغم اني حراااااامي
بس والله انا اتسرق مني شبشبين في جامع واحد وفي نفس ذات اليوم
يعني كنت قريب منه ولازم اصلي فيه
الحمد لله انا حرامي اه
بس والله ما اعرف حاجه عن الكوتشي بتاعك

جمعاوى روش طحن يقول...

إنت عارف أحسن حاجة إيه يا هندسة


الحته دى


] ونصيحة للأخ حرامي الأحذية هدي اللعب شوية .. ويأخي ابقى سيب حذاء قديم بدل اللي أخدته حتى .. بدل ما نروح حافيين

[

على أساس إن الحرامى ...بيدخل نت


!!

(:

جنّي يقول...

السلام عليكم
ما يقع الا الشاطر يا عم حبيب

بس ايه رأيك اك تدعي للي سرق الكوتشي وتقول : اللهم بارك له فيه اذا كان في حاجة له .. وان لم يكن في حاجة له فاجعلها آخر سرقاته ..
بس ممكن ارد على المهندس المصري انا في السعودية واتسرقت مرتين مرة كان بالخطأ ووجدت الحذاء تاني يوم امام المسجد بعد انصراف المصلين .. والمرة التانية واحد وفر حذائه وحافظ عليه من ماء الوضوء وتوضأ في حذائي وتركه سبيل في دورة المياه وطبعا اتبهدل ..
تعيش وتاخد غيرها
تحيتي

نهــــــــــار يقول...

السلام عليكم أخي حبيب ..
على فكره الموضوع ده منتشر في كل مكان تقريبا
بس الجميل عندكم في مصر بيكون فيه تحذير لنا نحن كسياح
بجد في الإسكندريه
كان الكل بيقولنا لما تدخلو المسجد خلوا بالكم من جزمكم
وفيه حجه دخلت تصلي
كانت شايله جزمتها في كيس داخل شنطتها

......
ماذا نقول لسارق
هداك الله وجعلها آخر سرقه لك..
...
دمت بخير..

يسرا يقول...

ههههههههههههههه
جزاك الله خيرا على النصائح الغالية.
أنا اتخيل أنك دلوقتي بتخاف تخرج بجذمة جديدة لتسرق منك.
لكنك أذا كنت بتركب المترو كتير فأعتقد أنك لازم تكتب موضوع تاني خلي بالكو من لبسكم و المحفظة و الكتب و الموبيل .

عالم حبيب يقول...

الحرامي

أطلع بالكوتشي يابني ههههههه ربنا يسدك يارب .. أضحك معاك طبعا

سعيد بزيارتك .. ياراجل مرتين في يوم واحد .. بس ما تقولش والنعمة .. أحلف بالله فقط :)


جمعاوي روش طحن

ايوة ياباشا .. الحرامي بيعمل سيرش على جوجل على المساجد علشان يختار أحذية عليها القيمة :)

عالم حبيب يقول...

جني

وعليكم السلام ورحمة الله وبركاته .. ربنا يهدي .. الموضوع منتشر في كل مكان صح .. بس في مصر أكثر شوية

عالم حبيب يقول...

نهار

وعليكم السلام ورحمة الله وبركاته .. أيوة صحيح في تحذير .. وما شاء الله معظم المساجد معلقة ورقة على الحائط .. معناها خلوا بالكوا من حاجاتكم وإدارة المسجد غير مسئولة .. اللي يدخل مسجد فيه الورقة دي يحط عينه وسط راسه :)

عالم حبيب يقول...

يسرا

بارك الله مرورك الكريم .. عادي بقى الواحد اتعود وربنا يستر .. أيام المترو ده أيام .. الله المستعان

fashkool يقول...

يا عم ياحبيب .. ايه بس اللى مزعلك
انت قلت على الصح.. وانا نفذت اللى قلت انت عليه ولاقيته صح .. طب ايه المشكله.. يا حبيبى يا حبيب العلم ليس فيه تكبر والقرآن ما حدش يقدر يكتبه غلط .. طب انت اخدت حسنات وخليتنى اخد حسنات من ربنا .. يبقى كتر خيرك .. وكل ما تيجى عندى وتلاقى خطأ او غلط نبهنى عليه عشان اصححه .. ومش دى اول مره .. لو رجعت لبوستين ولا اربعه عندى تلاقى برضه تصحيح للمدونه صفاء وانا عملت بيه ونوهت عن ذلك فى تحديث ..
اشكرك على التصحيح ودائما ربنا يكرمك

محمد مارو يقول...

للاسف
الواحد بيروح يصلى دلوقتى و للاسف لو بعيد عن بيتى بالى بيكون مشغول بحذائى مش على شان غالى الفكره على شان هروح ازاى منهم لله بيبوظوا صلتنا

نورت مدونتى
اتمنى ان تهتم بالموضوع و تحاول نشره
حفاظا على اهلينا

د.توكل مسعود يقول...

سرق متاع لعبدالله بن مسعود .. فدعا الناس على السارق .. فقال أما وقد دعوتم عليه فإني أدعو له "اللهم إن كان أخذه لحاجة فبارك له فيه وأغنه من فضلك "

وكنت أرجو أن تدعوا لسارق الكوتشي أن يوفقه الله ليضرب به وجه زعيم من زعماء هذا الزمان .

:) : )

fahd يقول...

ليه ياعم كده تقلب عليا المواجع

فكرتني بالذي مضي

انا بقي عندي عقدة

في اقل من اسبوعين يتسرق لي كوتشيين ولسه جداد

وبيبقي الموقف محرج جدا


وفي الاخر تروح بشبشب حمام

علي فكره الشخس اللي بيسرق الجزمة من المسجد مينفعش يتقال عليه اخ

يتقاله اخ منه

ده اميلي ياريت تضفي عندك

fahdebnyonis@yahoo.com

مصطفي احمد يقول...

ههههه

ده بيحصل كل يوم

حصلي اكتر من مره

حسبي الله ونعم الوكيل

بنت الاسلام يقول...

السلام عليكم حبيب
تعيش وتاخد قصدى وماتخدش غيرها
بس انت شكلك كدة موعود بسرقة الجذم فاكر ولا ؟


المهم
خير خير عسى ان تكرهوا شيئا وهو خير لكم

فى حاجة تسمحلى اقول راى المتواضع فى شكل المدونة الجديد؟

بالنسبة لشكل المدونة
اناشايفة ان الاتنيى حلوين وكل شكل منهم لية جمالة ورونقة الخاص بية
بس الشكل القديم كان بيحسسنى بالتفاؤل اكتر
واكتر حاجة كانت بتعجنى الورقة اللى كانت على جنب ومكتوب فيها
i lov ابو بكر وعمر
يس المدونة دى خط الكلام فيها اريح

من راى انك ممكن تجمع مميزات المدونتين فى مدونة واحدة
يعنى ممكن تخلى شكل المدونة دى توحى بتفاؤل اكتر من كدة مع مراعاة ان الخط يكون واضح ومريح


النت لسة عندنا فاصل اللة المستعان


دعواتى لك بكل الخير :بنت الاسلام

بنت الاسلام يقول...
أزال المؤلف هذا التعليق.
انت تسال والكمبيوتر يجيب يقول...

دعوه
الأخ العزيز/او الأخت العزيزه
تحيه طيبه
ندعوك للمشاركه فى برنامجنا الأذاعى عن النت والمدونات من الأذاعه الرئيسيه لمصر اى اذاعة البرنامج العام وهو يذاع يوميا التاسعه وعشر دقائق صباحا عدا الجمعه وبموقعنا رابط بالضغط عليه والأتنتظار قليلا وقت أذاعة البرنامج يمكنك الأستماع الينا
ندعوك لزيارة مدونتنا والتعليق على ما نطرحه من موضوعات وهذه التعليقات تذاع باسماء اصحابها فى حلقات برنامجنا
المدونه
http://netonradio.blogspot.com
الموقع
http://dear.to/cairo

أبو العريف يقول...

عالم حبيب
ضحكتني يا مان
بس دا بيحصل في احسن العائلات
انا بقي ضاع شبشبي في المسجد الحرام
وانا قال ايه حاطي جنب العمود اللي جنب منب عشان ما يضيعش

EMMY BABY يقول...

هههههههههههههههههههههههههه

بجد ربنا يسامحه

بس انت ربنا وقعك فى واحد بن حلال اداك جزمة تروح بيها

غيرك بقى بيروحوا بشبشب الحمام

بجد ربنا يهديهم والله مالقوش غير المسجد اللى يسرقوا منه

تحياتى

ايمى

انت تسال والكمبيوتر يجيب يقول...

دعوه
الأخ العزيز/او الأخت العزيزه
تحيه طيبه
ندعوك للمشاركه فى برنامجنا الأذاعى عن النت والمدونات من الأذاعه الرئيسيه لمصر اى اذاعة البرنامج العام وهو يذاع يوميا التاسعه وعشر دقائق صباحا عدا الجمعه وبموقعنا رابط بالضغط عليه والأتنتظار قليلا وقت أذاعة البرنامج يمكنك الأستماع الينا
ندعوك لزيارة مدونتنا والتعليق على ما نطرحه من موضوعات وهذه التعليقات تذاع باسماء اصحابها فى حلقات برنامجنا
المدونه
http://netonradio.blogspot.com
الموقع
http://dear.to/cairo

norahaty يقول...

السلام عليكم ورحمة
الله تعالى وبركاته
اتعملت فى جدى الله يرحمه كتير
تقولش الحرامى كان معلمه !!!
كل ما كان يدخل يصلى فى الجامع
اللى جنب الشغل يرجع بالقبقاب
ايوة القبقاب :):)اصل جدى كان
كبير شويه فى السن ماكانوا اخترعوا
الشباشب على ايامه....يلا فداك والحمد لله مارجعتش حافى زى ابو على الشهير ب حسن حنفى :)