مشكلة العيش في مصر .. حكومة فاشلة .. فهل بدأ الشعب يستفيق ؟؟؟

والله عيب اللي بيحصل في مصر ده .. من فترة قليلة يقطعون المياه عن ابناء قرية برج البرلس وتحويل مواسير المية إلى مصيف بلطيم علشان مزاج السادة المصطافين .. وخرج الناس ساعتها وقطعوا الطريق الدولي - اللي لحظ الحكومة بتاعتنا الأسود – بيمر من عندهم .. وبمجرد اعلان الناس غضبهم وخلال ساعات رجعت المية لمجاريها .. يعني فيه مية أهوه !!

ولأن الحكومة بتاعتنا لا تتعظ .. ولا تأخذ دروس من الأحداث فقد تكرر المشهد من جديد .. ولكن هذه المرة ليس عن طريق قطع المياه .. ولكن بمحاربة الناس في لقمة عيشهم .. ولقمة العيش هو تعبير مصري بنستخدمه وبنقصد بيه الرزق بصفة عامة .. من أمثال : ( ياعم خلينا ناكل عيش .. لقمة العيش .. الخ ) .. والعيش للأخوة العرب اللي ما يعرفهوش هو " الخبز " .. وبالنسبة للأخوة الأجانب هو " البرَد bread " .

وعندما أقول إن الحكومة بتحارب الناس في لقمة عيشهم وسمعني واحد مصري زي حالاتي فمش هايكون عنده أي تعليق لأني لم أضف له جديد .. حيث أن المعنى الذي وصل إلى ذهنه أن الحكومة الرشيدة بتاعتنا بتضيق على الناس وقرفاهم في حياتهم .. وده العادي والطبيعي .. لكن عندما يكون المقصود هو المعنى الحرفي للكلمة .. وهو أنهم يحاربون الناس في رغيف العيش .. بمعنى إن المواطن المصري المطحون ما يلقاش حتى رغيف العيش اللي ياكله .. تلك والله هي الداهية الدهياء التي تجز الغلاصم وتقطع الحلاقم .. مع اني مش عارف ايه الغلاصم دي

طبعا بعض المواقع والقنوات بتحاول تصور الناس دول اللي خرجوا متظاهرين احتجاجا على " قرار الحكومة توزيع العيش بالبطاقة عشر ترغفة لكل عيلة في اليوم " تحاول أن تصورهم على إنهم شوية همج رعاع وقطاع طرق – بالرغم من الاعتراض على أي تخريب يحدث في مثل هذه المظاهرات .. الناس خلاص فاض بيها وطفح الكيل وبلغ السيل الزبى وانحدرا .. في ظل الغلاء الرهيب والارتفاع الهائل في اسعار كل حاجة

الحكومة الغبية بتاعتنا فاكرة ان الناس هبلة .. سعادة المحافظ يخرج ويقول إن دول شوية عيال ما كملوش كام واحد .. والموضوع خلص .. مش عارف أنا الناس دي عايشة في كوكب تاني ولا ايه .. ومش عارفين إن في حاجة اسمها وسائل اعلام بتصور وبتنقل على الهواء .. والأمور مش زي زمان لما كان ما فيش غير القناة الأولى والتانية والتالتة بيطلع المسئولين على كيفهم يقولوا اللي هما عاوزينه .. ياسعادة المسئولين في الأن فضائحيات تفضح اللي بتعملوه .. وفي حاجة اسمها انترنط .. والدنيا اتغيرت .. فوقوا بء وحسوا ان الناس فاهمة كل حاجة مش زي ما انتم متصورين

وأنا باتابع الموضوع في بعض المواقع وباقرأ تعليق الزوار .. عجبني كتير من التعليقات على الموضوع في " العربية " لبعض الزوار يدعون الناس إلى الرجوع لله جل وعلا .. وإن الله لا يغير ما بقوم حتى يغيروا ما بأنفسهم .. وان لازم الناس تكون ايجابية .. وحتى بعض التعليقات من غير المصريين يظهرون تعاطفهم مع اخوانهم .. لكن على الجانب الآخر بعض التعليقات من الأخوة العرب يظهرون الشماتة بالمصريين .. شوفوا
التعليق ده " يا مصارية اسمعوا .. أنا ناوي أجيبكم السعودية .. يلا اعملوا قرعة بينكم .. بجيب 5000 شحّاد و ..جِعان ، أكون كيذا أكرمتكم بدال ما قارفينا بالشحدة .. الكلام جدّي للتواصل على الإيميل " وحاطط الايميل سعادته .. تعليقي : ربنا يشفي

المشكلة ان الحكومة قبل كده بقيادة بابا مبارك .. طول عمرها قرفانا في حياتنا .. لكن كان بين الحين والحين تضغط وبعد كده تسيب مساحة للتنفس .. لكن الأن ضغط ضغط ضغط .. الضغط يسبب الانفجار .. ارتفاع اسعار بشكل فاحش .. ويبرروا ده بأن ارتفاع الاسعار ده في كل الدنيا .. ارتفاع اسعار عالمي .. طيب ياجماعة هو مرتباتنا في مصر مرتبات عالمية !! .. المعتقلات مليانة وتتمدد بشكل رأسي وافقي .. وجاهزة لإستقبال المزيد .. خيرة ابناء مصر جالسون على القهاوي .. ومن يجد فرصة للهروب منها باحثا عن فرصة خارجها لا يتردد .. واسألوا كل بلاد الدنيا ستجدون ابناء هذا الشعب الطيب هم الطاقات التي تعمل في هذه البلاد .. في حين أن هذه الطاقات لم تجد متسع لها في بلدها

طبعا الناس مطحونة في ظل غلاء الأسعار والحكومة بتاعتنا بتصدر غاز لإسرائيل في اتفاقية لبيع الغاز الطبيعي لمدة خمستاشر سنة .. طبعا لأن الشعب الصهيوني شعب مسكين .. واليومين دول حر عاوزين يشغلوا المكيفات .. وفي الشتا يدفوا بالغاز بتاعنا ويدعولنا.. وكله بثوابه .. وكمان علشان يشغلوا المصانع اللي يعملوا فيها الأسحلة اللي بيقتلوا بيها الفلسطنيين وبيصطادوا بيها الجنود المصريين من على الحدود .. ونفس الاتفاقية مشتركة فيها اسبانيا .. اللي دخل الفرد فيها خمستاشر ضعف دخل الفرد المصري حسب ما سمعته من شوية من بي بي سي .. بقي أن أذكر أن احنا بنبيع الغاز بدولار أو 75 سنتا للمليون وحدة حرارية بريطانية وهو سعر يقل تسع مرات عن سعر السوق العالمي اللي هو 12 أو 14 دولار

أخيراً

يقول الله تعالى: ﴿ إن الله لايغير مابقوم حتى يغيروا مابأنفسهم وإذا أراد الله بقومٍ سوءً فلا مرد له ومالهم من دونه من والٍ ﴾[ الرعد:11]

و قال صلى الله عليه وسلم : يا معشر المهاجرين خصال خمس إذا ابتليتم بهن وأعوذ بالله أن تدركوهن لم تظهر الفاحشة في قوم قط حتى يعلنوا بها إلا فشا فيهم الطاعون والأوجاع التي لم تكن مضت في أسلافهم الذين مضوا ولم ينقصوا المكيال والميزان إلا أخذوا بالسنين وشدة المؤنة وجور السلطان عليهم ولم يمنعوا زكاة أموالهم إلا منعوا القطر من السماء ولولا البهائم لم يمطروا ولم ينقضوا عهد الله وعهد رسوله إلا سلط الله عليهم عدوهم من غيرهم فأخذوا بعض ما كان في أيديهم وما لم تحكم أئمتهم بكتاب الله عز وجل ويتحروا فيما أنزل الله إلا جعل الله بأسهم بينهم . ‌[7978 صحيح الجامع]