2009-07-30

رخصة مصر ورخصة دبي

بسم الله والصلاة والسلام على رسول الله .. حاولت ابدأ الموضوع بالفصحى البسيطة كالعادة لكن لم أستطع .. وجدت الكلمات تأبى إلا أن تخرج بالعامية ربما لطبيعة الموضوع .. الموضوع لتوضيح بعض السلوكيات المنتشرة في مجتمعنا .. لا أدري ربما كان هناك خطأ منا لمسايرتنا الواقع الأليم وعدم التمرد عليه .. والله يصلح حال بلدنا يارب

قبيل سفري بفترة نصحني أخي الذي يعيش في دبي منذ فترة بتعلم القيادة ( السواقة ) في مصر قبل السفر .. بالفعل توجهت إلى أحد مدارس تعلم القيادة علشان آخد كورس في السواقة

بدأت الحصص .. كانت الحصة ب 20 جنيه لمدة ساعة – يابلاش – ما كنتش متخيل أبداً إني أركب عربية كده وأسوق وسط الناس وعربيات الميكروباص عن يميني و( التكسة ) – جمع تاكسي – عن شمالي .. كنت أذهب بشكل شبه يومي لمدة شهر تقريباً

كنت بأتعلم على عربية 128 .. ياربي .. بيقولوا اللي بيتعلم على ال 128 يقدر يسوق أي عربية تانية ودي حقيقة جربتها .. كانت العربية من غير مرايات جانبية وشكلها حتة خردة ماشية على أربع عجلات

طبعاً كانت لا تخلوا أيام التعليم من شوية نرفزة من ( المُعلم ) اللي هو عم فتحي .. لما مثلاً العربية تبطل مني وأنـا بأغيّر أو لما ( أحود ) على اللي ماشي جنبي .. بس الحق يتقال كان راجل مية مية وعلمني كويس

المهم مشيت الأيام .. علمني عم فتحي .. ازاي امشي بالعربية .. ازاي ألف .. ازاي أرجع لورا .. ازاي اركن .. ازاي اطلع كوبري وانزل منه .. لحد ما جه يوم الأقماع

في يوم قلتله ياعم فتحي أنا خلاص بقى الحمد لله دلوقتي بأعرف أسوق كويس وعاوز اروح اطلع الرخصة .. اليوم التاني لقيته جايب أقماع معاه في العربية .. وخدني في شارع مهجور .. قلت استر يارب :) .. فتح باب العربية ونزل وأخد الأقماع وقعد يرصها .. ايه ده ياعم فتحي !! .. قالي : ده تدريب على الامتحان .. امتحان ايه ياعم فتحي !! هو الامتحان عبارة عن أقماع !! .. قالي : أيوة .. انت لازم تمشي بين الأقماع دي وتعدي من بينهم من غير ما تلمسهم ولا توقع واحد منهم

ايه ده ياعم فتحي !! يعني انت عمال تعلمني .. وهات ورا .. وهات قدام .. واركن .. واطلع كوبري .. وانزل من الكوبري .. كل ده علشان شوية الاقماع دي .. مش المفروض يمشوني في الشارع ويشوفوا بأسوق كويس ولا إيه ؟

قالي : هو ده الامتحان .. بس ربنا يستر .. الأقماع دي المسافة بينها بتتسع وبتضيق حسب المزاج .. انت تعرف حد في المرور ؟ .. عندك واسطة ؟ قلتله واسطتي ربنا ياعم فتحي .. المهم اتدربت على موضوع الأقماع دي كويس .. وحفظت الخطوات عن ظهر قلب

ودعني عم فتحي ونصحني إني أشوف واسطة .. نصحني البعض إن الموضوع لازمله حرف الواو ( واسطة يعني ) خصوصاً لأن موعد سفري قرب

ذهبت إلى أحد أصدقاء والدي أظنه عقيد .. الراجل ما اتأخرش .. اداني ورقة كتب فيها ( السيد رئيس مرور .... تحية طيبة وبعد .. الرجاء مساعدة .... في استخراج رخصة القيادة ) دي طبعا اسمها تأشيرة .. أول مرة أعرف ان التأشيرات ألوان حسب الأهمية واعتبارات اخرى .. هو كان كاتب بقلم أخضر

المهم تاني يوم رحت المرور وتوجهت إلى مكتب السيد رئيس المرور واديته الورقة .. قالي المطلوب ؟ قلتله عاوز أعمل رخصة شخصية .. مضالي على الورقة وقالي انزل لعبد الله بيه تحت

نزلت .. سألت على عبد الله بيه .. آتاريه أشهر من النار على العلم .. مكتب عبد الله بيه ليه شباك بيتقدم منه الطلبات وليه باب للخروج والدخول طبعاً .. كان واقف على الشباك واحد أو اتنين .. وكان واقف على الباب طابور طويل .. طبعاً كلهم معاهم تاشيرات .. قلت آه يعني الكل فاهم المسألة ومختصر على نفسه المسافة بدل ما يجي ويسقط جاي ومعاه التأشيرة السحرية

وصلت لعبد الله بيه .. قالي روح شباك مش عارف كام وهات طلب استخراج رخصة واملاه .. جبت الورق ومليته ورجعتله .. اخدوا الورق ,, طلب استخراج الرخصة ,, صورة البطاقة ,, كشف باطنة ( مش عارف ليه ) ,, كشف نظر ,,,,, الخ وفوقهم التأشيرة الخضراء المباركة .. واتدبس كله مع بعضه

بعدها قالي روح امتحن .. قلت في نفسي .. امتحن ايه ياراجل !! امال التأشيرة دي لازمتها ايه .. المهم رحت المكان بتاع الامتحان ومعايا الورق .. طبعاً ما كانش معايا عربية .. دخلت على الراجل اللي بيمتحن قلتله عاوز امتحن .. قالي هات عربية .. قلتله مش معايا عربية .. وبعدين أنا جايلك من عند فلان باشا ( طبعاً دكهوا بيه بس ده باشا ) قالي : ولو .. لازم تجيب عربية تمتحن بيها .. طيب منين أجيب عربية ؟ .. قالي بيأجروا برة الساعة ب 50 جنيه

قلت أمري لله أروح أجيب عربية وأجي .. وأنا خارج من الباب لقيت واحدة ست كبيرة بتنادي عليا : يابني انت عاوز عربية تمتحن بيها ؟ .. قلتلها أيوة ياحاجة .. قالتلي طيب أنا عندي عربيات .. بكام ياحاجة ؟ .. قالتلي : ب 25 جنيه .. قلتلها طيب

الست قالتلي تعال ورجعتني تاني جوة الساحة اللي بيمتحنوا فيها .. لقتها راحت لواحد من اللي واقفين علشان يمتحنوا وبتقوله : يابني ادي العربية لأخوك يمتحن بيها ويرجعهالك تاني .. قلت آه دي هاتشحت عليا بقى .. قلتلها ياحاجة انتي عندك عربية ولا لأ ؟ .. قالتلي أيوة يابني بس كلهم مشغولين دلوقتي

أهوه حظك حلو واحدة فضيت تعال .. رحت على العربية .. ركبت .. أدور مش راضية تدور .. قلتلها مش راضية تدور .. نادت على واحد جه دور العربية .. مشيت بالعربية لحد الراجل اللي بيمتحن .. قالي : هات ورا .. جيت أجيب ورا الجير مش راضي يتحرك .. لقيت الباب التاني بيتفتح وواحد قعد يحاول مع الجير لحد ما جاب ( مارشيدير ) .. طلع واحد من نفس المنطقة بتاعتي ما اعرفوش أوي يعني .. هو كان جاي يخلص ورق وشافني بأمتحن فحب يوّجب معايا

وأخيراً الراجل قالي انزل ناجح .. ياه مش مصدق نفسي .. ناجح مين ياعم .. ده العربية ما مشيتش تلات خطوات على بعض .. أمال فين الأقماع والشغل الجامد .. فينك ياعم فتحي وفين دروسك ومحاضراتك

نجحت .. نجحت .. الحمد لله .. جبت كام في المية بقى ياعم .. دي ولا الثانوية العامية .. الراجل مضالي على الورق وقالي اطلع اتصور .. طلعت اتصورت وخلصت الإجراءات ونزلت استلمت الرخصة من تحت

هي دي رخصة مصر .. وعرفت بعدها ليه التأشيرة كان لونها أخضر .. ممكن علشان نفس لون الكوسة ,,, انتظرونا مع تفاصيل رخصة دبي إن شاء الله

23 التعليقات:

Fahd يقول...

هههههههههههههههههههههههههه

والله ضحكتني يا اخي
فعلا شر البلية ما يضحك

انا لم اعيش هذه اللحظات من قبل بس يمكن عشت ظروف مشابهه في ايام الجيش وورق الجيش
وكان لازم ولابد ان اقولهم انا من طرف هيثم بية

خير

بنت الاسلام يقول...

هههههههه على رايك الدنيا فعلا ماشية كوسة وطبعا حرف الواو دة اساسى ...حتى الكهرباعشان ندخلها فى الشقة اللى المفروص اصلا انها من حقنا برضة ماشية بحرف الواو
وتفتكر بقى انها دخلت ؟
الاجابة لا طبعا ....لية ؟عشان ماهى كوسة

ربنا يرحمنا برحمتة
دعواتى لك بكل الخير : بنت الاسلام

على عبدالله يقول...

السلام عليكم

انا بقى اخذتها من قصيرها وقدمت فى المدرسة !
وطبعا كان لازم من واسطة حتى يسجلونى فى اقرب مدرسة والا استنى خمس شهور !!
كنت اروح اتمرن كل يوم لمدة خمسة عشر يوما
كان الاخ (المعلم) يركبنى السيارة لمدة عشرة دقائق ويقولى انزل !!
الاقى غيرى يقعد يلف بالسيارة لمدة ساعة !!
عندما سألت علمت ان الساعة بعلبة سجائر !!!
قلت فى نفسى والله لو رجليك بقت فوق ومشيت على ايديك مش هاتشوف منى مليم واحد !
والحمد لله استلمت الرخصة

فى انتظار رخصة دبى
تحياتى

حائر في دنيا الله يقول...

وقبل ما أقرأ الموضوع الجاي أعتقد انك فهمت الفرق بين مصر ودبي كبير أوي ليه كدا؟

السلام عليكم

ahmed_k يقول...

يا صديقي أنت حظك حلو
لو كان إمتحانك بقه في مرور الغردقه كنت حتدخل وسط الأقماع مهما جبت من تأشيرات ولو بطلت منك العربيه يووووووه شهر تأجيل على طول ههههه
قول الحمد لله

عالم حبيب يقول...

Fahd

طبعا ياهندسة لازم تقول من طرف هيثم بيه والله المستعان

بنت الاسلام

في حرفين ليهم تأثير كبير جدا في مجتمعنا حرف الواو ( واسطة ) وحرف الراء ( رشوة ) للأسف داخلين في كل شئ في مجتمعنا :(

على عبدالله

اه مانا برضه حاولت اتعلم في المدرسة ورحت مساكن شيراتون حيث مقرها لكن لقيت هاقعد سنتين :)

حائر في دنيا الله

يعني خلاص ما اكتبش الموضوع الجاي :)

ahmed_k

خلاص نيجي ياعم مرور الغردقة علشان نشوفك :)

جمعاوى يقول...

يعنى إنت طلعت رخصة دبى .؟

ده إنت تبقى ميه ميه ..

الرخصة المصرية فى أى دولة عربية غير معترف بيها تماما تقريبا


ع العموم متابعين

سندس وأمل يقول...

ههههههههههههههههههههههههههههه

وعجبى..!!

امل

نهــــــــــار يقول...

السلام عليكم...
أخي ماشاء الله ناجح من أول مره ولا إمتحان
لاهو خارجي ولا داخلي فعلا إمتحان كوسا ..
هل فعلا هذا ما حدث ..
بس عموما الحمدلله إن عم فتحي هو إلي علمك يعني مش مهم إزاي طلعت الرخصه المهم التعليم ...
.....
بس كله كوم وتأجير سياره للإختبار كوم ...
......
دمت بخير

كلمات من نور يقول...

ما شاء الله نجحت زيي أهو وأخدت الرخصة بس أنا بقى اول يوم انزل أسوق حلفت 100 يمين ما أسوق في بلادنا

الناس كلها ماشيه غلط وبتوع المبكروباص اخر اخلاق في السواقه وتيجي تركن ادام محل كباب وكفته يقولي أسف يا أنسه: أنسة إيه يا ابني والعيال اللي في العربية دي استلفتهم؟؟ اقوله مافيش علامة ممنوع الوقوف يقولي معلس بس الفاترينه...أقوله طيب يمين على يمين ما أنا متحركة من مكاني وهاتلي الضابط

جوزي حس إنه حيلمني من الإقسام كل ليلة وصعب عليه العيال الصغير يناموا عالبورش وقالي فكري في موضوع السواقه دي الا العملية شكلها انتحارية

وعنها الرخصة في جيبي والعربية بعتها بعد ما السواقيين خربوها .أخ يا نهار أبيض الرخصة لازم أجددها من 3 سنين

بس اعتقد برضه من السهل أجيب معايا اتنين كيلو كوسة واروح أهو بتنفع برضه جايز نسافر بره ويقطعونا علشان نطلع رخصة.في انتظار رخصة دبي

اقدم عاصمه فى الحب يقول...

السلام عليكم

مش عارف اكتب تعليق اقول فى ايه
بس تسلم ايدك على البوست والله ينور يا جميل
وهى التأشيره لونها أخضر...؟
تصدق والله ما كنت اعرف
اصل بينى وبينك كده انا عمرى ما اشتكيت من مصر
مش عارف ليه بقه يمكن علشان انا لسه ما اتعاملتش مع الفئات الفاسده او حاجه تانيه بقه مش عارف
فبالتالى مش قادر ابدى رأى مفيد
لكن كل اللى اقدر اقوله
شكل مصر مزعله ناس كتير اوى
.
.
يا ريت تتقبل مرورى
مودتى :)

ابو صهيب ( الجمعاوي الاصيل)سابقاً يقول...

اخي الفاضل

لقد عايشت هذه المشكلة مع احد الاصدقاء حينما كنت ازوره في دبي

وهو معاه رخصة مصري وخدها برده كده بكل سهولة

وسقط اربع مرات علشان ياخد رخصة دبي او زي مابيقولوا عليها لسن

ومازال الى الان يبحث عن اللسن

غير معرف يقول...

انا مقرتش ومن غير ما اقر بقولك احلى كلام

غير معرف يقول...

لا استنا هى دى فعلا مصرام الجدعنه والفتونه وووووووووووووووو

على عبدالله يقول...

السلام عليكم

كل عام وانتم بخير

مبارك عليكم شهر رمضان

نـــــــــــــور يقول...

كل سنه وانت طيب وبخير ياحبيب
والسنه الجايه تكون هنا مش فى الغربه
رمضان ركيم

نهــــــــــار يقول...

السلام عليكم ..
مبارك عليك الشهر أخي

أبو العريف يقول...

كل سنه وانت طيب ياباشا

رمضان كريم

عالم حبيب يقول...

جمعاوى

ايوة الحمد لله معايا رخصة دبي .. بس شكلي هأجي اشتغل بيها عتبة عتبة :) لا رخصة مصر محترمة جدا في كوالالمبور :)

سندس وأمل

أضحك الله سنك وبارك مرورك

نهــــــــــار

وعليكم السلام ورحمة الله وبركاته

هذا ما حدث وربنا يبارك في جهود عم فتحي

كلمات من نور

فكرتيني بالسواقة في مصر .. مش متخيل أبدا اني اسوق في مصر .. ربنا يرحمنا برحمته

عالم حبيب يقول...

اقدم عاصمه فى الحب

وعليكم السلام ورحمة الله وبركاته

لا لا لا دي مصر دي أحلى بلد في الدنيا .. ربنا يصلح حالها يارب

ابو صهيب ( الجمعاوي الاصيل)سابقاً

ربنا يعينه ويقويه يارب .. أكيد هاياخد الليسن بس المشكلة أمتى .. ربنا يوفقه ويوفقك :)

غير معرف

ياهلا ياهلا

على عبدالله

وعليكم السلام ورحمة الله وبركاته

مبارك علينا وعليك .. كل عام وأنت إلى الله اقرب

mahasen saber يقول...

رمضان كريم عليك يا حبيب وكل شهر فضيل وانتا بكل صحه وستر

anawafkary يقول...

هههههههههههههههه
بالظبط اللي حصل معايا
و ده خلاني اخد رخصة دبي من سادس مرة

تحياتي

saad يقول...

ولا في الأحلام رخص سياقتكم مش رخص سياقتنا ولو نتشابه من ناحية الواو