2008-09-13

حلينا الواجب .. تاجين من الأخت " ايمى " ـ غلطة مطبعية ـ




بسم الله الرحمن الرحيم



بداية .. كل عام وانتم بخير .. مر من رمضان 12 يوم .. يارب نكون ممن عتقت رقابهم من النار .. وصلني التاجين دول من الأخت ايمى .. صاحبة مدونة غلطة مطبعية جزاها الله كل خير .. نجاوب عليهم إن شاء الله .. معلش هأستخدم العامية علشان يكون التعبير أسهل



بدأت التدوين من امتى ؟ ودخلت العالم ده أزاي ؟

بدأت التدوين في آخر ليلة من رمضان للعام 1427 هـ .. بالميلادي 22 تشرين الأول 2006 .. نقلت التاريخ زي ما هو كده من مكتوب بس مش عارف ايه تشرين ده :)

دخلت أزاي ؟ طبعا سميت الله ودخلت .. يمكن ما كانش غريب عليا هذا العالم لأن قبلها كنت أشارك في العديد من المواقع والمنتديات .. وكان عندي موقع ومنتدى اسمه نبضات إيمانية .. المنتدى اخترق عن طريق أحد الهاكرز .. وأصلا ساعتها كنت وصلت لدرجة من الملل من الأنترنت بكل ما فيه .. فزي ما تقولوا قلت خير وبركة


أول مدونة لي كانت على مكتوب وكان اسمها جئنا لنشر الخير وهو الأسم اللي كنت اشارك بيه في المنتديات وهو نشيد رائع جدا لأبو عبد الملك .. بعد كدة رحت على الوورد بريس .. ما حستش براحة فيهم .. وأخيرا استقرينا في البلوجر

ايه كان انطباعك في البداية ؟

بصراحة في البداية كان دخولي عالم التدوين هو هروب من عالم المنتديات والأنترنت بالكامل .. فانشأت المدونة وكنت أنوي أن تكون عالمي الخاص .. مجرد مكان أنقل فيه ما أخطه في دفتري .. ويمكن تلاحظوا ده في أول تدوينة لي .. علشان كده سميت المدونة عالم حبيب

نقلت للمدونة الموضوعات القديمة اللي كنت كاتبها قبل كده .. وواصلت بعدها .. في البداية ولوقت قريب كانت المدونة مكانا مغلقا .. لا يزورني أحد ولا أزور أحد .. الفترة الأخيرة بدأت أتواصل واتفاعل مع عالم التدوين بشكل أكبر

مين اكتر واحد بتهتم بتعليقه على بوستك الجديد ؟

كل الناس في السؤال ده بتجاوب إجابات دبلوماسية .. يعني بيقولوا كل الناس وكده .. لكن أكيد في ناس معينة الواحد بيهتم بتعليقهم .. وأكيد انت / انتي واحد منهم طالما إنك بتقرأ هذه الكلمات :)


إيه أهم حاجة اتعلمتها من عالم التدوين ؟

- إن الواحد يحاول يستفيد قدر الإمكان من الأفكار الكتيرة

- إني أكون موضوعي في نظرتي للأشياء .. وعدم الحكم على شخص من موضوع واحد كتبه أو كلمة قالها

- إن الإختلاف في الرأي لا يفسد للود قضية

- إن أنا وأنت اللي بنقرر حجم استفادتنا من أي موضوع مهما كان الموضوع مهم جداً جداً جداً .. أو مجرد فكرة بسيطة


أكتر حاجة كرهتها ؟

كلمة الكره كلمة كبيرة .. ولكن ممكن أقول حاجات ما حبتهاش

- حسيت إن ناس كتير لمجرد انهم عملوا مدونة وناس بدات تزورهم ويتناقشوا في قضايا .. بيبدأوا يحسوا انهم كبار بقى و "يخبطوا" في خلق الله

- ما حبتش ان في ناس بيدخلوا يعلقوا .. ويكون الموضوع في وادي والتعليق في وادي .. وده معناه انهم ما قرأوا أصلا أي شئ

- العلاقات بين بعض المدونين خصوصا الشباب والفتيات .. ساعات بأحس في بعض الحوارات والتعليقات إن الولد والبنت قاعدين مع بعض على المصطبة .. أو متربيين مع بعض تحت سقف واحد .. بيتخطوا كل الحواجز


حاسس إن التدوين له تأثير ؟

- طبعا .. على المستوى الفردي .. يعني .. الواحد بيحاول إنه يعرف أفكار جديدة .. يكتسب معلومات جديدة في مختلف النواحي والأفكار .. بأقدر أنمي قدراتي في الكتابة والتواصل مع الآخرين .. أدب الخلاف إن حدث

- على المستوى السياسي والإجتماعي .. له تأثير أيضا .. وإن كانت حكومتنا الإسمنتية لا يؤثر فيها شئ ولا بيهمها لا تدوين ولا غيره .. كتير من السياسيين عندهم مدونات علشان يوصلوا للناس ويخطبوا ودهم .. التدوين بيقدر يوصل لهموم الناس والحاجات اللي وسائل الإعلام ما بتقدرش تنقلها .. لأنه بإختصار : من الناس وإلى الناس









أذكر 5 أحلام على الأقل تخص ماضيك وتحلم فيها بتغيير أشياء .. ماذا ستعدل وماذا ستترك ؟

- كنت أحلم أن أدخل كلية الألسن وأدرس اللغة الألمانية وجبت 92% أدبي .. فرقت معايا بدرجة .. مكتب التنسيق صحاني من الحلم ده ههههههه

- كنت بأحلم كمان إني اسافر وخصوصا المانيا .. وسافرت ولكن دبي بدل المانيا .. ما فرقتش كتير :)

- حلمت كتير إني اشتغل في مجال الطيران .. لأنه مجال ممتع بجد .. وحصل واشتغلت فترة .. لكن بعدت عن المجال ده لما سافرت


- حلمت إني أختم القرآن الكريم حفظا .. وإن شاء الله لا زال من الأحلام والطموحات المستقبلية


- الحلم الأخير مش فاكره :)



أذكر 5 أحلام على الأقل تخص مستقبلك ؟

- بأحلم إني أكوّن اسرة مسلمة .. الزوج والزوجة متفاهمين .. بيحاولوا انهم يعيشوا الاسلام في جو من السعادة .. والحمد لله أخذت أول خطوة واخترت شريكة حياتي إن شاء الله اللي أحسبها على خير ولا أزكي على الله أحدا

- بأحلم إني أقف أمام الكعبة .. وده بجد .. مرات كتير شفت في الرؤيا إني أمام الكعبة .. يارب يكتبهالي .. قولوا آآآمين

- بأحلم إني أشتغل في شركة كبيرة .. يكون لها نظام إداري وهيكل وظيفي بدل أن يكون كل شئ في إيد واحدة

- بأحلم بيوم يصبح مجتمعنا فيه مثالي .. مش زي مدينة افلاطون الفاضلة .. لكن زي مجتمع محمد صلى الله عليه وسلم وأصحابه

- بأحلم بالجنة .. وتكونوا معايا إن شاء الله


أذكر شخصين على الأقل متواجدين في حياتك حاليا .. كنت تود وجودهم قبل الأن بزمن ؟

- طبعا خطيبتي هههههه .. كنت أتمنى وجودها في حياتي طبعا من زمان .. كان زماننا متجوزين دلوقتي :) .. ربي يحفظها

- أنتم كلكم .. بجد أنا بأحبكم في الله واسأل الله أن يجمعنا في الفردوس الأعلى


أذكر شخصين على الأقل غير متواجدين في حياتك حاليا .. كنت تود وجودهم الأن أو في حياة أولادك مستقبلا ؟

- يستحي قلبي أن أذكر غيره .. محمد صلى الله عليه وسلم .. كم أتمنى رؤيته والعيش معه .. اسأل الله كما حرمنا رؤيته في الدنيا أن يجمعنا معه في الفردوس الأعلى

- محمد ( حمادة ) .. أحد أحبابي وأخواني .. توفاه الله عزوجل في حادث بعد سفري بأيام .. كان صاحب همة عالية في كل شئ .. يعود من عمله ويذهب بعدها إلى أحد اللجان الخيرية .. افتقدتك الأيامى واليتامى يامحمد .. رحمك الله .. رأيته قريبا في الرؤية وكان وجهه كأنه القمر




كده نكون حلينا الواجب الحمد لله .. ودول على فكرة أول تاجين لي في عالم التدوين .. دايما بأكون مبسوط وأنا باتواصل معاكم .. ربي يجمعنا في الدنيا على الطاعة وفي الآخرة في الجنة إن شاء الله



محب الخير لكم : حبيب

18 التعليقات:

Blue Nile يقول...

احلامك جميلة
ربنا يديك الزوجة الصالحة وتزور الكعبة وتحفظ القران وكل اللي تتمناه

حسن حنفى يقول...

ربنا يحقق لحضرتك كل ماتتمناه

يارب

اجابات متميزه

حنين.. يقول...

ربنا يحققللك كل احلامك
وخاصة حفظ القران
والاسره المسلمه
والشركه
كل حاجه يارب
دمت سالممممممممم
فى انتظار المزيد

عاشــــــ النقاب ـقــــة"نونو" يقول...

السلام عليكم
اولا اجاباتك كلها الخاصة بعالم التدوين تقريبا منهجي برضه موافقة عليها وكاني انا اللي كتبتها
احلامك ياااااااااارب تتحقق واسرارك اصبحت مكشوفة
لكن شخصية جديرة بالاحترام
رمضان كريم

(أم البنين) يقول...

أسأل الله أن يوفقك في تحقيق أحلامك
وأسأل الله أن يرحم صديقك ويجعله من أهل الجنة
وأوافقك في رأيك عن حوارات بعض البنات والشباب في التدوينات وكأنهم فعلا على مصطبة
ولو تقابلوا وجها لوجه ما تحدثوا بتلك الطريقة

نسأل الله الهدايةلنا ولابنائنا للجميع

عالم حبيب يقول...

blue nile

بارك الله فيكي أختى وجزاكي الفردوس الأعلى

حسن حنفي

اللهم آمين يأبو على
أسعدني مرورك حبيبي

حنين

جزاكي الله كل خير .. ويارب يحققلنا جميعا احلامنا يارب

عاشقة النقاب

وعليكم السلام ورحمة الله وبركاته أختى الفاضلة
رمضان كريم .. ويارب يتقبل منا ومنكم صالح الأعمال

أم البنين

جزاكي الله كل خير .. اللهم آمين .. وربنا يهدي الشباب يارب


جزاااكم الله خير الجزااااء

Habiba يقول...

الف ماشاء الله عليك وعل كلامك
بجد بحييك
زادت شخصيتك احترام عندى
ربنا يبارك فيك وليك
وكملك مع خطيبه وتبقى زوجه المستقبل عل خير

ربنا يحققلك كل امانيك يارب
تحياتى

انا جيت ميت مره علشان اقرا التاج وكل مر اقرا حته اصله طويل وانا باجى وانا اصلا مشغوله بميت حاجه
يلا خير
دمت بخير

appy يقول...

كل تاج وانت طيب
وربنا يديلك اللى انت عاوزة

EMMY BABY يقول...

احلى حاجة بجد فى التاجات دى انها بتعرفنا على ناس حلوين اوى كدة من جوة

بجد انا مش هقدر اقول غير زى ماقلتلك قبل كدة بحس فيك بالهدوء والرزانة وبحس فيك بنقاء القلب

يارب تحقق كل احلامك ويجمعك انت وخطيبتك فى اسرة واحدة وتجيبولنا بنات وولاد صغيرين يطلعوا زيكم كدة

ربنا يرزقك رؤية الكعبة وحفظ القراءن الكريم

بصراحة مقدرش اديك اقل من 10 على 10

تستحقها بجدارة

تحياتى

ايمى

كيارا يقول...

اخيرار لقيت حد هاربان زيي من المنتديات بس انا مكنش ينفع اعمل اني انقل كل ما كتبته وان اكمل لان رصيد موضوعاتي يكفي سنتين تدوين فحطتهم في مدونه سريه

ربنا يوفقكك يارب دوما لما يرضاه
تحياتي
كيارا

د.توكل مسعود يقول...

حكمة.....بالغة

فإما سطور تضىء الطريق...وإما رحيل يريح القلم


نفع الله بك

Beram ElMasry يقول...

ان كنت ممن يتذوقون الشعر العامى والزجل ، ارجو زيارة مدونتى والتفضل بالتعليق

mahasen saber يقول...

طب بعدين بقه انا كنت ههديك التاج الاولانى لانه جالى هديه..كده جاوبته..
بس بالنسبه للتاج الاولانى حلو قوى بس ذكرت تخبيط المدونيين فى بعض واننا بنكلب بعض كاننا تحت سقف بيت واحد..عارف يا حبيب يا اخى الفاضل اعتقد انك هتقول عن المدونيين اليى مبيكتبوش غير بذائات وشتيمه عن الدين انا لقيت مدونات ملحده والعياذ بالله..
بعدين الحمد لله انا بقرأ الموضوع من اوله لاخره..
اما تاج الاحلام بقه اولا: الف مبروك على الخطوبه ربنا يحققلكم فى بعض اليى بتتمنوه..
ويباركلكوا فى بعض ويجعلكوا ازواج فى الدنيا والاخره..
ثانيا بقه اول مره اسمع حد بيحلم انه يشاغل فى شركه زى ما قولت كبيره ..الفكره يعنى انى حسيت انك بتحلم لشغلك كمان ..
وحسيت ان بتواجهك مناغصات فى شغلك الحالى ولو فيه ربنا ييسرلك كل الامور ان شاء الله..
اما صديقك رحمة الله عليه اسال الله ان يكون من عتقائه من النار وان يتغمده بوافر رحمته وان ينزل السكينه والصبر على اهله ويجمعه بهم فى جناته ان شاء الله..
ربنا يوفقك وتحفظ القران الكريم قلبا وقالبا..وتختمه حفظا فى العشر الاواخر من رمضان وفى مكه امام الكعبه..
بارك الله لك فى كل شئ غالى عليك..
وان شاء الله يحققلك كل ما تتمنا ..

نهر الحب يقول...

يارب تحقق كل احلامك
وتكت لنا اد اية تعبت فى تحقيقها
سلمت اناملك
تحياتى

عالم حبيب يقول...

habiba

الله يكرمك يارب

ومعذرة على التطويل .. بس هما تاجين مع بعض .. معلش تعبناكي معانا

appy

مشكوووورة على المرور .. ويارب يستجيب منك

emmy

جزاكي الله خير على الكلام ده كله .. ويارب يجعلنا خير مما تظنون ويجعل بواطننا خير من الظاهر يارب العالمين

كيارا

المنتديات فيها الجيد والسئ .. انا بصراحة كنت مليت من الأنترنت كله .. احيانا الواحد ما يرتب اولوياته بطريقة صحيحة .. وهنا المشكلة

د- توكل مسعود

أسعدني مرورك الكريم جزاك الله خير

beram el masry

ههههه ياراجل طب قول رأيك في الكلام الأول .. وعلى العموم هانزور مدونتك ياسيدي

mahasen saber

اولا جزاكي الله خير على كل اللي كتبتيه .. بالنسبة لقصدي على اللي بيخبطوا في خلق الله .. اقصد اللي بيصيبهم الكبر والغرور ويفتكروا نفسهم كل شئ ومن حقهم ينقضوا اي شئ


نهر الحب

اللهم آمين .. جزاكم الله خير

بنت مصريه يقول...

بجد ما شاء الله عليك
ربنا يوفقك يا رب وتحقق احلامك كلها
خصوصا حلم ختم القرءان حفظا
ومش انت بس انت وانا وكل المسلمين ليكون شفيع لنا يوم القيامه
احييك عالتاج الهايل

Beram ElMasry يقول...

اخى العالم الحبيب
السلام عليكم ورحمة الله وبركاته
اعتقد يا اخى الكريم ان هذه حالى ، لان عندما اتخبط فبما ارى وتتشابك الامور ولا اعرف منها فاكا اوهروب فبالتاكيد ان مدهول
، مع اعزازى وتقديرى
وارجو التكرم بمعاودة الزيارة لمدونتى
ولا تحرموننى من النقد والتوجيه
مع خالص شكرى وامتنانى

مـــالك يقول...

السلام عليكم
الاستاذ حبيب المووقر
بجد أنا حبيتك لله وبجد لما قريت عنك حبيتك جدا ووالله في الله ومقدرتش أمنع نفسي إني أقولك كده
إني أحبك في الله
أصلي بجد عندي أمل في دعاء الشيخ الشعراوي "اللهم إني أعلم أني عاصيك ولكني أحب من يطيعك فاجعل اللهم حبي لمن أطاعك شفاعة تقبل لمن عصاك"
ربنا يكرمك يا أستاذ حبيب وتحقق أحلامك وخصوصا العمرة والحج مرارا بإذن الله وساعتها افتكر إدعي لواحد غلبان دخل مدونتك بالصدفة اسمه مالك
عموما يارب مكنش تقلت عليك ويارب يكون ما بينا تواصل
تحياتي