2008-09-08

خواطر رمضانية .. مراسلكم من جائزة دبي الدولية للقرآن الكريم

بسم الله الرحمن الرحيم

كل عام وانتم بخير .. كل رمضان وأنتم إلى الله أقرب وعلى طاعته أدوم .. مع غروب شمس هذا اليوم يكتمل عمر رمضان هذا العام 1429 اسبوع واحد بالتمام والكمال .. انقضى من رمضان سبعة أيام .. يالله ما أسرعها .. كأنها أضعاث أحلام .. أو طيف زار في المنام .. من السُنة تهنئة النبي لأصحابه بقدوم هذ الشهر الكريم .. واعذروني إن جاءت متأخرة .. فمنذ بداية الشهر وأنا أحب أن أكتب عن رمضان وأهنئ نفسي وأحبابي أن بلغنا الله الشهر .. لكني كنت لا أجد الروح التي أكتب بها .. ربما لأن هذه أول مرة يمر علي فيها رمضان في الغربة بعيدا عن بلدي وأهلي .. شئ صعب أن تأتي ساعة الافطار وتكون وحيدا .. أحيانا لا يملك الإنسان دموعه حنينا

بعد مرور اسبوع من رمضان استطيع أن أؤكد لكم :-

- أنه لا يوجد رمضان غير في مصر – واللي يقولكم غير كده بيضحك عليكم – النور والزينة وأصوات المدافع ساعة الافطار .. والأطفال اللي بيلعبوا بالفوانيس بعد الفطار .. وصوت الشيخ محمد رفعت قبل الفطار .. واللمة على السفرة .. والكنافة والقطايف .. حتى على المستوى الايماني اللي هو المقصد الأول من رمضان .. الشوارع نفسها بتحس فيها بريحة رمضان .. الخشوع اللي بتحسه في المساجد حتى لو في زاوية صغيرة .. رمضان في مصر مختلف تماما وله طعم تاني .. رمضان في مصر غير

- إن في ناس مش فارق معاها رمضان غير إنهم لا بياكلوا ولا بيشربوا بس .. غير كدة رمضان عندهم زي أي يوم عادي .. وصدق رسول الله صلى الله عليه وسلم : رُب صائم حظه الجوع والعطش .. ورب قائم حظه من قيامه السهر .. رواه الطبراني وصححه الألباني

- إن الخطط اللي كتير مننا بيرسمها لرمضان أحيانا لا يُكتب لها النجاح .. يعني مثلا : واحد مخطط إنه يقرأ في رمضان كل يوم خمس أجزاء .. أو إنه يصلي كل ليلة قيام الليل في المسجد ويرجع يكمل في بيته لحد الفجر .... الخ .. أول يوم يقرأ جزء .. تاني يوم نص جزء .. أول يوم يصلي التراويح في المسجد .. بعد كده يصلي أول اربع ركعات .. يبدأ سخن وبعدين يعود مرة أخرى .. لأنه قبل رمضان لا كان بيقرأ قرآن ولا بيقوم الليل .. التروس مصدية .. متعطلة عن الدوران لمدة سنة .. عمرها ما هاتشتغل بكامل طاقتها مع أول دوران للمحرك .. لازم تليين للتروس الأول .. بس المهم التليين ده ما يحصلش وتبدأ التروس تلف ويكون رمضان خلص .. لازم تكون الخطط واقعية وواضحة علشان نقدر نحققها ونستمر عليها بعد رمضان علشان التروس ما ترجعش تصدي تاني

في موضوع كنت كتبته العام الماضي بعد انتهاء رمضان بعنوان .. لا تبك على اللبن المسكوب .. حبيت أذكر به لعل إن شاء الله يكون فيه فائدة


---------------------------------------------------------------------------------


قدر لي ربي أن أحضر أمس وأول أمس فعاليات جائزة دبي الدولية للقرآن الكريم






ما شاء الله كان الحضور كبير جدا .. يمكن دي من الحاجات الجميلة اللي حسستني بشوية من جو رمضان هنا .. لأن الحياة هنا رتمها سريع ولا تعطي الفرصة للتجمع .. ذهبنا بعد صلاة التراويح .. ترامى إلى مسامعنا من خارج القاعة صوت جميل يشدوا بالقرآن .. كانت مفاجأة جميلة بوجود الشيخ الطبلاوي حفظه الله



قام الشيخ بتلاوة ما تيسر بصوته العذب خلال اليومين .. وقدر ربي والتقيت بالشيخ أمس بعد المحاضرة .. أخذ أحد الأصدقاء لي صورة مع الشيخ .. شوفوا الشيخ بس مش لازم أنا :) ـ



كانت محاضرة الشيخ محمد حسان أول أمس بعنوان الطريق الأقوم كان موضوعها عن الصدق وإنه الطريق الأقوم والسبيل لصلاح الأمة .. لم نجد مكان في القاعة فقام أحد المنظمين بإيجاد مكان لنا على المسرح بجانب الشيخ .. كانت محاضرة جميلة ما شاء الله في جو إيماني معطر بعبق رمضان



فعاليات يوم أمس .. كان لقاء مع الأستاذ عمرو خالد .. وكانت محاضرة فعلا رائعة من سلسلة قصص القرآن التي يقدمها الأستاذ عمرو خالد في رمضان



بدأ الأستاذ عمرو خالد بمعنى إيماني جميل عن العتق من النار .. وإن ست أيام من رمضان مروا وفي كل يوم لله عتقاء .. فياترى نحن ممن عتقنا من النار في الأيام الماضية .. وتعرض لمعنى آخر جميل وهو إن لازم نخفف حملنا أثناء سيرنا إلى الله .. وشبه الموضوع بالمسافر عبر المطارات .. كل ما كان معاه حقائب أقل يمر بسرعة وينهي اجراءاته بسرعة .. انتقل بعدها لقصة أهل الكهف .. تحدث عن شئ بصراحة أول مرة كنت أسمع عنه وهو معنى الرقيم في قول الله : أَمْ حَسِبْتَ أَنَّ أَصْحَابَ الْكَهْفِ وَالرَّقِيمِ كَانُوا مِنْ آيَاتِنَا عَجَباً [الكهف : 9] .. وأن أهل أصحاب الكهف سجلوا اسماؤهم على الصخر .. أي أن فتية الكهف تركوا بصمة في الحياة .. وكيف أن الله غير نواميس الكون من أجل هؤلاء الفتية



تحدث أيضا عن ذو القرنين .. والقوم الذي طلبوا منه بناء السد .. وأن هؤلاء القوم كان لديهم كل الامكانيات .. فقط كان ينقصهم الإرادة .. وأن ذو القرنين لم يقم ببناء السد بنفسه .. وإنما طلب منهم أن يعملوا : قَالَ مَا مَكَّنِّي فِيهِ رَبِّي خَيْرٌ فَأَعِينُونِي بِقُوَّةٍ أَجْعَلْ بَيْنَكُمْ وَبَيْنَهُمْ رَدْماً [الكهف : 95] .. ختم اللقاء بدعاء اسأل الله أن يتقبله



الأستاذ عمرو يداعب مجموعة من الأطفال بعد المحاضرة





قمت بزيارة لمعرض صور يحكي عن تاريخ جائزة دبي منذ انطلاقها عام 1418 هـ .. وبعض التصاميم الإسلامية بالخط العربي .. قمت بتصوير بعض اللوحات





































كل عام وأنتم بخير

22 التعليقات:

حسن حنفى يقول...

فعلا رمضان في مصر مختلف تماما
بس يارب يفضل كده علي طول

عالم حبيب يقول...

حبيبي حسن .. يسعدني دائما مرورك .. مصر برغم بكل ما فيها من مشاكل بس هي أحلى بلد في الدنيا كلها رغم كل ما فيها .. تحياتي

قلب مصرى يقول...

الحمد لله إن لسه فى حاجة فى مصر أحسن من بره
لكن حقيقى الجو الرمضانى فى مصر غير عادى بالمرة بتحس بتغيير فى كل حاجة حتى الجمادات.

ربنا يتقبل منا صالح الأعمال

عاشــــــ النقاب ـقــــة"نونو" يقول...

السلام عليكم
تغطية هايلة
مصر ام الدنيا
ربنا يحفظها يارب
ويشيل اللي تاعبينها ومغلبينها ياقادر يا كريم
ترجع بالف سلامة
تحياتي

Habiba يقول...

اولا هنيئا لك سعادتك اليومين الل فاتوا ويارب قلبك سعيد دايما

ثانيا زعلت قوى من حكاية الوحده وعدم امتلاكك لدموعك احيانا

ربنا معاك يارب

ثالثا بقى بيتهيالى جو رمضان فى مصر دلوقتى حتى مابقاش زى زمان

مش زمان قوى يعنى
يعنى وانا صغيره كده

كنت تلاقى الناس بينها الفه اكتر
دلوقتى الالفه ضاعت فى زمن العولمه

تحياتى

Blue Nile يقول...

رمضان كريم عليك
بجد ربنا يباركلك
وتغطية جميلة
انا مجربتش رمضان في حتةتانية غير مصر بس اكيد احلى حاجة اللي اتعودنا عليه
اللوحات جميلة جدا
تحياتي ليك

بنت سيناء..سويركية وافتخر يقول...

عالم حبيب


والله صحيح ويظهر هذا فى القنوات الفضائية ما بتحس بجو رمضان فيها زى القنوات الارضية المصرية


اللهم اجمعك واهلك على خير


والله انت كسبتها بعد هالصور وحضورك للمهرجان لا تتكلم ..احسن حاجة والافضل الصور اللى خليتنا نحضر معاك



اللة يوفقك

EMMY BABY يقول...

بجد بوست جميل جدا

ربنا يرجعك مصر بالسلامة وتستمتع تانى بجو رمضان

بما انك مبقتش تدخل مدونتى فانا بقلك انى اهديتك تاج عندى

تحياتى

ايمى

عالم حبيب يقول...

قلب مصري
اللهم امين تقبل الله منا ومنكم صالح الأعمال
رمضان في مصر مختلف بالمرة .. كفاية اللمة والجو الايماني الجميل

عالم حبيب يقول...

عاشقة النقاب
وعليكم السلام ورحمة الله وبركاته
بارك الله فيكي أختي الفاضلة
"ويشيل اللي تاعبينها ومغلبينها ياقادر يا كريم" آآآآآآآآمين

عالم حبيب يقول...

habiba
الله يكرمك يارب أختي الفاضلة
ربي يهنيكي
انا معاكي برضه في الموضوع ده ان الزمن بيتغير .. لكن برضه تبقى اشياء تميز رمضان في مصر .. انا كنت في أحد الأماكن من يومين واذن المغرب .. ولا سمعت اذان ولا حسيت برمضان .. قلت ياااه .. لو كنت في مصر كان زمان الناس واقفين في الشوارع يناولك اي شئ تفطر عليه وتسمع الاذان من هنا وهناك .. ربي يحفظ بلاد المسلمين

عالم حبيب يقول...

blue nile

الله اكرم
احلى شئ انك تقضي رمضان في مصر .. اللوحات فعلا عجبتني لذلك حبيت اوريها لكم .. تحياتي

عالم حبيب يقول...

بنت سيناء

بارك الله مرورك الكريم
اللهم امين
ورمضان كريم

عالم حبيب يقول...

emmy baby
جزاكم الله كل خير

المعذرة على التقصير في متابعة المدونة ولكن الظروف احيانا تحكم .. فالوقت في رمضان محدود .. غير اني أدخل الأنترنت عن طريق المودم وكل شوية يفصل .. لكن دائما أتابع مدونتك ومدونات الأخوة جميعا حتى وان لم يسمح الوقت بترك تعليقات في كل الأوقات

تقبلي تحياتي

حنين يقول...

تغطية رائعة وترجع بسلامة لمصر ان شاء الله تقبل مرورى ويريت تنور مدونتى همس الحنين

some one يقول...

السلام عليكم ورحمه الله وبركاته

بارك الله فيك على هذا المجهود الرائع

مدونه رائعه وتغطيه رائعه وايضا صاحب المدونه رائع

وكل عام وانت بخير

اخوك فى الله احمد
some one

نهر الحب يقول...

اية رأيك تشرفنا بالتواجد معنا يوم السبت؟ 13/9 هنتقابل فى مستشفى ابو الريش الساعه 3 عصرا للتبرع للاطفال
؟؟؟
وباقى التفاصيل عندى بالمدونة

norahaty يقول...

السلام عليكم ورحمة الله وبركاته
قضيت عامين السعودية
واظلنى فيهما رمضان
فكان كما قلت
واكثر مما قلت
ولكن كتير من ابواب
الخير تفتح فى رمضان هناك
لمست هذا هناك فى ذلك الوقت
وانا احكى عن حكومة وشعبآ
جزاك الله كل الخير على ما ذكرتنى
وعلى مانقلته من فعاليات
جائزة دبى الدولية للقرآن الكريم
(هل دبى حقيقة تسحب البساط من تحت اقدامنا؟
سؤال اوجهه اليك باعتبارك تقطن او تعيش هنا وهناك)
وتقبل احتراماتى

عالم حبيب يقول...

جزاكي الله خير ياحنين .. الف مبروك المدونة .. قرأت اول موضوع وفي انتظار المزيد ان شاء الله

عالم حبيب يقول...

some one

بارك الله مرورك الكريم حبيبي أحمد

كل عام وانت بخير

عالم حبيب يقول...

نهر الحب

كنت أتمنى أكون معاكم .. لكن وجودي خارج مصر يمنعني للأسف .. لكن ان شاء الله أدعوا لكم بالتوفيق وأقول ما شاء الله على الهمة العالية ربي يحفظكم

عالم حبيب يقول...

norahaty

وعليكم السلام ورحمة الله وبركاته

أولا مشكورة على المرور وتعليقك الكريم .. ذكرياتك ما شاء الله حلوة .. لكن كل مجتمع يختلف عن الاخر .. تبقى السعودية بلد الاسلام .. وهنا ايضا في خير .. لكن كثرة الأجانب وغير المسلمين يفقد رمضان بهجته فلا تكاد تشعر به

بالنسبة لسؤالك : هل دبى حقيقة تسحب البساط من تحت اقدامنا؟

دبي جزء من الامارات العربية المتحدة .. وأي شئ فيه اتحاد ستجدينه قوي .. الولايات المتحدة والمملكة المتحدة والاتحاد السوفيتي كان .. كل دول مصدر قوتهم الاتحاد

ودبي خصوصا مثال للبلد اللي حصلت فيها طفرة رهيبة .. يحكي لي الكثير ان من 10 سنوات كانت صحراء .. هناك شارع اسمه الشيخ زايد ده اللي ملئ بناطحات السحاب .. يحكي لي أحد المهندسين من يومين أنه كان يسير في هذا الشارع من 10 سنوات وكان بنايات دور ودورين وأماكان فاضية كتير .. الأن لا تجد فيه " خرم ابرة " وفي دبي بالكامل

لكن يبقى ارتفاع الاسعار الجنوني خصوصا في السكن ناقوس خطر .. فالكثير بدأ يهجر البلد نظرا لعدم قدرته لى التأقلم ومواجهة الغلو المرتفع .. لكن أخشى من أنه ما طار طير وارتفع إلا كما طار وقع

أهم ما يميز دبي هو العدل بصراحة .. يعني اذا حصلت حادثة لا قدر الله فالكل سواسية أمام القانون .. سواء اجنبي او من اهل البلد .. واهل البلد هنا طيبين .. عموما ربي يحفظ بلاد المسلمين ويخليلنا حبيبة قلبنا مصر