مواقف طريفة حدثت لي (1) خلوا بالكوا من جزمكوا

بسم الله والصلاة والسلام على رسول الله صلى الله عليه وسلم .. أحببت في وسط تلك المشاكل وهذي الهموم أن أذكربعض المواقف الطريفة التي حدثت لي .. من باب قول الرسول الكريم صلى الله عليه وسلم ( وأحب الأعمال إلى الله سرور تدخله على مسلم ) صحيح الجامع 176 .. واسمحوا لي أن أكتب بالعامية حتى أعبر عن الموقف كما حدث .. أسأل الله أن تملأ السعادة قلوب المسلمين يارب العالمين

الموقف الأول

كنت في الكلية في يوم من الأيام .. خلصت ومروح قرب العصر كده .. الكلية كانت في جاردن سيتي .. علشان أروح إما إني أركب المترو من محطة أنور السادات أو من محطة السيدة زينب .. في اليوم ده قررت أركب من محطة السيدة زينب

العصر أذن عليا في الطريق .. كنت ساعتها عديت القصر العيني وكان في مسجد في الشارع اللي بيطلع على المترو قلت أصلي الأول وبعدين أركب المترو .. دخلت المسجد .. خلعت الحذاء – أعزكم الله – وكان كوتشي لسة جديد لانج وحطيته على الرف بتاع الأحذية في آخر المسجد

أقاموا الصلاة .. الإمام واقف بيسوي الصفوف : استقيموا واستووا واللي معاه موبايل يقفله وكل واحد يخلي باله من حاجته وإدارة المسجد غير مسئولة عن أي حاجة – الإمام زمان كان بيقول استقيموا واستووا .. دلوقتي محتاج يقول قصيدة طويلة قبل الصلاة – المهم أنا قلت في نفسي : آه ربنا يستر على الكوتشي .. بس أنا في الصف الأول هأرجع ورا علشان كوتشي يعني

صلينا وقمت بقى علشان أستكمل طريقي المفروش بالورود والزحمة والزق وكتف من هنا وكتف من هناك داخل المترو .. رحت علشان آخد الكوتشي إلا وما فيش كوتش :) دور ياعم .. هنا هنا .. ما فيش .. والمشكلة مش أنا بس .. لا .. كان معايا واحد تاني .. استسلمت للأمر الواقع وقلت آخد شبشب من الحمام وخلاص .. وأنا بأتخيل نفسي بقى .. واحد لابس شيك على شبشب حمام :)

المهم .. الراجل التاني .. شريكي في السرقة ( طبعا إحنا اللي اتسرقنا مش العكس ) كان ساكن قريب من المسجد .. صعبت عليه .. قالي استنى وراح جابلي " جزمة " من البيت أروح بيها – جزاه الله خير – هي صحيح ما كانتش لايقة على الهدوم بس معلش :)

المهم روحت البيت لا جبتلهم سيرة ولا خبر وكتمت على الموضوع .. بعد كده واحد علمني حيلة كويسة .. إني لما أجي أدخل مسجد أحط فردة في ناحية والفردة التانية في ناحية بعيدة .. الحرامي طبعا مش هاياخد فردة واحدة ههههههههه ومع ذلك ما فيش فايدة برضه بعدها اتسرقت والمشكلة الحذاء كان جنبي بالضبط بس مش عارف اتاخد أزاي



ملاحظة :-


اللي بيجيله قلب يسرق حاجة من بيت ربنا أكيد انسان فاقد الأمل في كل شئ .. تخيلوا الحرامي اللي بيسرق الأحذية من المساجد ده بيروح يبيعها علشان يشتري علبة سجاير أو أي من البلاوي التانية .. والموضوع منتشر .. ونصيحة للأخ حرامي الأحذية هدي اللعب شوية .. ويأخي ابقى سيب حذاء قديم بدل اللي أخدته حتى .. بدل ما نروح حافيين



وأخيرا .. خلوا بالكوا من جزمكوا :)



ونستكمل مع موقف آخر إن شاء الله .. قريباً