2008-12-15

فردتي حذاء هدية الشعب العراقي للرئيس الأمريكي

بسم الله الرحمن الرحيم


كل عام وأنتم جميعا بخير .. تقبل الله منا ومنكم صالح العمل

تحديث

تحولت قصة بوش والحذاء إلى لعبة .. تستطيع أنت أيضا أن توجه الحذاء إلى بشبش على هذا الرابط :)

http://www.kroma.no/2008/bushgame


الحقيقة كنت ناوي أكتب موضوع جديد غداً إن شاء الله .. والأن الوقت متأخر وكنت رايح أنام بس سمعت خبر في بي بي سي فدخلت دورت في المواقع وحبيت أشارككم بالخبر لأنه عجبني .. واسمحولي أكتب بالعامية


بوش طبعا باقي له كام يوم و " يغور " من وشنا


فحب يطّمن على رعاياه ( من أمثال المالكي وطالباني .... الخ ) في العراق .. ويشوف جنوده ويديهم هدية الكريسمس بتاعهم


فعمل زيارة مفائجة للعراق


بعد ما خلص " لفَته" قال نعمل بقى مؤتمر صحفي


المؤتمر الصحفي كان حاضر فيه إيه ؟؟ أكيد صحفيين


واحد صحفي قال في نفسه : يعني بوش مش أحسن مننا علشان يجي ويدي رعاياه هدية الكريسمس


لازم احنا كمان نديله هدية دي حتى آخر زيارة ليه قبل ما يغور من البيت الإسود


فقام " قالع " جوز الحذاء من رجليه - مع إنهم جوز غاليين عليه جدا بس بوش يستاهل مش خسارة فيه - وراميهم على مستر بوش .. وقاله ياكلب .. دي هدية الشعب العراقي ليه بمناسبة انتهاء ولايته





طبعا بوش شكله متدرب على تفادي الأحذية .. يادوب الفردتين عدوا من جنب وشه ما فيش سنتيمتر



ده مقطع فيديو لما حدث




دي صورة كنت صممتها يوم عرفة مناسبة للموضوع كمان .. طبعا اضغطوا على الصورة لرؤيتها بحجم أكبر




دي روابط عن الخبر من الجزيرة وبي بي سي


http://www.aljazeera.net/NR/exeres/690310D7-51A2-41FB-A175-34678C4CA784.htm


http://news.bbc.co.uk/hi/arabic/world_news/newsid_7782000/7782741.stm


وأخيرا .. تعيش وتاخد غيرها يامستر بوش : )

13 التعليقات:

( : ريحانة الجنة يقول...

اووووول تعلق وهرجع تانى

أكون أو لا أكون يقول...

هههههههههههههه يله خلينا كلنا نحتفل اليوم بهذه المناسبه السعيده... شكل الفيديو ده حيتحط على المدونات كلها
...
المنظر رومانسي جدا...

( : ريحانة الجنة يقول...

السلام عليكم حبيب
اية السرعة دى ماشاء اللة
انافتحت الكمبيوتر قبل ما انام لانى توقعت انك هاتكتب عن الموضوع دة
بصراحة ليك حق اصلة خبر جامد مايخليش الواحد يستنة

واللة لسة حالا سامعة الخبر فى النشرة
لقيت بابا بينادى عليا وبيقولى اجرى بسرعة تعالى شوفى (بشبش)بيحدفوة بالجذم
بجد حركة جامدة اوى
وماقدرتش امسك نفسى من الضحك

لا واية المشكلة انة اضرب بالجذمة وبيضحك ومنشكح على الاخر
وبيقول
(ادييييينى اكتر)

شكلة كدة واخد على ضرب الجذم
وانكشف خلاص وبقت فيضحتة بجلااا قصدى بجذم
اصلة هو فاكر ان اخرتة اية؟
ادية فى اخر ايامة (واللى بيقولوا علية رمز القوة والتحضر)انضرب بالجذمة


واللة الشعب العراقى دة مية مية
اية الجرائة دى!بالجذمة
يانهار جذمة قصدى يانهار ابيض
معلش اعمل اية؟ماأنا بجد مش مسدأة
(بوش ورنيييش اسود علية وعلى اللى جابوة )




معلش اعذرنى على الالفاظ دى
اصل الواحد جواة كلام كتيييير وكاتم فى نفسة

بس بصراحة الراجل اللى عمل كدة دة بطل بطل بطل
وحركتة الجامدة دى عبرت عن جزء قليل من اللى جوانا

معلش طولت عليك


دعواتى لك بكل الخير.....بنت الاسلام

نـــــور يقول...

تعرف
الواد ده عاجبنى جامد
راجل راجل راجل يعنى
بس اللى اثر فيا فى الموضوع لما عرفته منش شويتين كده ان الواد هيروح فى حديد والجزمه ماجتش فى وش المذكور
خساره والله كان نفسى اشوفها وهى جايه فيه :((

أحمد (زوج مخنوق ). يقول...

بجد الشعب العربي بالكامل فرحان باللي اتعمل ده
و مش العرب بس
لا ده العالم كله
انا دخلت اليويتيوب من شوية على الفيديو بتاع الجزمة ده لقيت عليه حوالي 3 الاف تعليق من جميع دول العالم
الناس معظمها فرحان فيه بشكل مش ممكن
بعد اذنك هاخد الصورة احطها عندي في المدونة

تحياتي

واصطنعتك لنفسي يقول...

وأخيراً

"رجل"

أكاذ أتخيل حالته النفسية التي جعلته يقدم علي مثل هذا الفعل مع إدراكه التام بمصيره

يااااااه لو كانت جت فيه

Unknown يقول...

الله يحفظ البطل

Kiara يقول...

عاااااااااااااا كان نفسي ابقي اول تعليق

هو اللي حصل انا فرحانه بيه لكن تفتكر اخدنا حقنا

حسن حنفى يقول...

ههههههههههههه

بستاهل والله اكتر من كده

وربنا مع الشجاع اللي عمل كده

جنّي يقول...

السلام عليكم

علشان كدا انا قلت ان على منتظر الزيدي ان يذبح هدي لانه رجم الشيطان بعد ايام التشريق ..

ودا بيت شعر محور من شعر احمد مطر

وبوش اذا ضرب بالحذاء
صاح الحذاء باي ذنب اضرب ( بضم الالف ) ..

تحيتي

EMMY BABY يقول...

بجد والله ما يستاهل غير انه ياخد بالجزمة فعلا

بس اتضايقت اوى انها مجتش فى عينه

وقال المالكى بيحوش الجزمة عنه

ههههههههههههههه بس خبر مضحك على قد ما يفرح على قد ما حزنت من انفعال الراجل اللى اداله بالجزمة شكله معبى ياعينى


ياترى هيعملوا فى ايه ؟؟؟؟؟؟؟؟؟؟


الصورة انا شغتها قبل العيد وعجبتنى اوى لايقين القرنين على بوش

تحياتى

ايمى

أمل حمدي يقول...

اللهم ادخل الفرحة على قلوب المسلمين واشف غليلهم اللهم امين

كل عام وانت بكل خير يارب

مهرة سالم يقول...

السلام عليكم..

.......
بوش طبعا باقي له كام يوم و " يغور " من وشنا

هههههه
إذا كدا إكتب كل يوم بالعامي..
.......
طبعا هو للأسف الجزمه إدنست من رؤية وش بشبش عن قرب...
بس مش خساره فيه..
........
الله يفرج على منتظر..
.........
دمت بخير