حوار بين صديقين عن الزواج

بعد صلاة عشاء أحد الأيام التقى صديقان .. فرقتهم الأيام لفترات طويلة مع أنهم كانوا نادراً ما يفترقون أيام الدراسة ,, وهذه هي الحياة ,, ودار بينهما هذا الحوار :-

- السلام عليكم ورحمة الله وبركاته

* وعليكم السلام وررررحمة الله وبركاته .. أهلاً أهلاً

مزيد من الأحضان والقبلات .. بس خلوا بالكوا من انفلونزا الكتاكيت : )

* فينك يابني عاش من شافك ؟

- انت اللي فينك .. انا باسأل عليك على طول بس انت اللي مختفي

* والله الظروف .. انت عارف الدنيا .. بأرجع من الشغل متأخر كل يوم يادوب على النوم

- الله يعينك .. المهم انت عامل ايه طمني عليك ؟

* والله الحمد لله .. أدينا عايشين .. انت اللي ايه اخبارك ياباشا ؟

- الحمد لله في نعمة

هاه .. ايه ياعم انت مش ناوي تتجوز ولا ايه ؟

* ههههههه اتجوز ايه ياعم هو أنا لاقي آكل

( ابتسامة ) ايوة ياعم تتجوز .. وهما يعني اللي اتجوزوا أحسن منك !!

* لا ياعم .. خلينا كده أحسن .. بدل ما نجيب بنات الناس من بيتها ونعذبها معانا .. خليها هي في بيت أبوها وأنا في بيت أبويا أحسن

- آآآآآه بنت الناس مين بقى ؟ شكلك في دماغك حد معين .. آه يانمس طلعت مش سهل : )

* هههههه لا والله .. ما فيش حد في دماغي ولا في ايدي حتى .. أنا باتكلم عموماً .. أصلاً الموضوع ده أنا حاطه في صندوق المواضيع اللي مستحيل أفكر فيها في المخ زي حاجات تانية كتير

- حاجات تانية ايه بقى ان شاء الله !!

* حاجات كتير يابني اللي بيفكر فيها بيتعب فأنا حاططها في دفتر النسيان علشان ما اتعبش

- ماشي ياعم الفيلسوف .. بس بجد انت لازم تفكر في موضوع الجواز .. انت قربت على ال 30 يابني

* ياعم الحمد لله انا لسة 30 في ناس طلعت معاش ولسة ما دخلتش دنيا

( فاصل من الضحك )

* طيب ياعم انا هاتجوز منين .. يادوب الشغلانة اللي لقتها بعد ما تخرجت فلوسها ما بتكفنيش مواصلات وأكل .. وأهوه بأقضيها يوم كدة ويوم كدة

- ياعم انت بس امشي في الموضوع هاتلاقي الأمور اتيسرت .. ربك كريم .. انت مش عارف حديث النبي صلى الله عليه وسلم اللي بيقول : ثلاثة حق على الله أن يعينهم .. وذكر منهم الناكح يريد العفاف .. وبعدين ياعم هاتلاقي بنت الحلال اللي بترضى بقليلها وربنا هايباركلكم

* فين ياعم .. ما عادش في بنات كدة .. البنات دلوقتي عاوزين المريش المهيش

- هههههه مهيش ايه بس .. صدقني في .. دور على صاحبة الدين من بيت طيب .. بنت أصول يعني .. ولو صدقت النية ربنا هايرزقك .. وبعدين ياعم أديك شايف حال الشباب كلهم مش انا وانت بس .. وكل الاسر عارفة الأحوال .. لو كل الناس فكروا في المريش المهيش زي ما بتقول ما حدش هايتجوز .. واللي عندهم بنات عندهم ولاد .. آل تخليها في بيت أبوها آل

* ههههه اتريق براحتك .. المهم .. انت بقى اللي هاتتجوز امتى ؟

- قريب إن شاء الله .. انت عارف إني خاطب من فترة والحمد لله الأمور ميسرة .. من يوم ما مشيت في موضوع الجواز والحمد لله ربنا كارمني

* أخدت شقة وظبطت نفسك يعني ؟

- آه الحمد لله .. لقيت شقة ايجار حلوة .. وبأجهز فيها .. سبحان الله مش هاتصدقني .. أنا نفسي مش مصدق .. يعني لو جيت حسبتها بالورقة والقلم هاتقول لا يمكن .. بس ربك كريم

* انت شجعتني .. يعني أتوكل على الله وآخد أول خطوة نحو قفص الزوجية ؟

- هههههه قفص ايه ياعم .. يابني توكل على الله .. وخد أول خطوة نحو بيت الزوجية السعيد ان شاء الله .. بس ما تنساش تعزمنا في الخطوبة

* أكيد انت أول المعزومين .. بس ما تنساش الجاتوه : )

افترق الصديقان كل إلى حال سبيله .. على أمل اللقاء