2009-11-03

حوار بين صديقين عن الزواج

بعد صلاة عشاء أحد الأيام التقى صديقان .. فرقتهم الأيام لفترات طويلة مع أنهم كانوا نادراً ما يفترقون أيام الدراسة ,, وهذه هي الحياة ,, ودار بينهما هذا الحوار :-

- السلام عليكم ورحمة الله وبركاته

* وعليكم السلام وررررحمة الله وبركاته .. أهلاً أهلاً

مزيد من الأحضان والقبلات .. بس خلوا بالكوا من انفلونزا الكتاكيت : )

* فينك يابني عاش من شافك ؟

- انت اللي فينك .. انا باسأل عليك على طول بس انت اللي مختفي

* والله الظروف .. انت عارف الدنيا .. بأرجع من الشغل متأخر كل يوم يادوب على النوم

- الله يعينك .. المهم انت عامل ايه طمني عليك ؟

* والله الحمد لله .. أدينا عايشين .. انت اللي ايه اخبارك ياباشا ؟

- الحمد لله في نعمة

هاه .. ايه ياعم انت مش ناوي تتجوز ولا ايه ؟

* ههههههه اتجوز ايه ياعم هو أنا لاقي آكل

( ابتسامة ) ايوة ياعم تتجوز .. وهما يعني اللي اتجوزوا أحسن منك !!

* لا ياعم .. خلينا كده أحسن .. بدل ما نجيب بنات الناس من بيتها ونعذبها معانا .. خليها هي في بيت أبوها وأنا في بيت أبويا أحسن

- آآآآآه بنت الناس مين بقى ؟ شكلك في دماغك حد معين .. آه يانمس طلعت مش سهل : )

* هههههه لا والله .. ما فيش حد في دماغي ولا في ايدي حتى .. أنا باتكلم عموماً .. أصلاً الموضوع ده أنا حاطه في صندوق المواضيع اللي مستحيل أفكر فيها في المخ زي حاجات تانية كتير

- حاجات تانية ايه بقى ان شاء الله !!

* حاجات كتير يابني اللي بيفكر فيها بيتعب فأنا حاططها في دفتر النسيان علشان ما اتعبش

- ماشي ياعم الفيلسوف .. بس بجد انت لازم تفكر في موضوع الجواز .. انت قربت على ال 30 يابني

* ياعم الحمد لله انا لسة 30 في ناس طلعت معاش ولسة ما دخلتش دنيا

( فاصل من الضحك )

* طيب ياعم انا هاتجوز منين .. يادوب الشغلانة اللي لقتها بعد ما تخرجت فلوسها ما بتكفنيش مواصلات وأكل .. وأهوه بأقضيها يوم كدة ويوم كدة

- ياعم انت بس امشي في الموضوع هاتلاقي الأمور اتيسرت .. ربك كريم .. انت مش عارف حديث النبي صلى الله عليه وسلم اللي بيقول : ثلاثة حق على الله أن يعينهم .. وذكر منهم الناكح يريد العفاف .. وبعدين ياعم هاتلاقي بنت الحلال اللي بترضى بقليلها وربنا هايباركلكم

* فين ياعم .. ما عادش في بنات كدة .. البنات دلوقتي عاوزين المريش المهيش

- هههههه مهيش ايه بس .. صدقني في .. دور على صاحبة الدين من بيت طيب .. بنت أصول يعني .. ولو صدقت النية ربنا هايرزقك .. وبعدين ياعم أديك شايف حال الشباب كلهم مش انا وانت بس .. وكل الاسر عارفة الأحوال .. لو كل الناس فكروا في المريش المهيش زي ما بتقول ما حدش هايتجوز .. واللي عندهم بنات عندهم ولاد .. آل تخليها في بيت أبوها آل

* ههههه اتريق براحتك .. المهم .. انت بقى اللي هاتتجوز امتى ؟

- قريب إن شاء الله .. انت عارف إني خاطب من فترة والحمد لله الأمور ميسرة .. من يوم ما مشيت في موضوع الجواز والحمد لله ربنا كارمني

* أخدت شقة وظبطت نفسك يعني ؟

- آه الحمد لله .. لقيت شقة ايجار حلوة .. وبأجهز فيها .. سبحان الله مش هاتصدقني .. أنا نفسي مش مصدق .. يعني لو جيت حسبتها بالورقة والقلم هاتقول لا يمكن .. بس ربك كريم

* انت شجعتني .. يعني أتوكل على الله وآخد أول خطوة نحو قفص الزوجية ؟

- هههههه قفص ايه ياعم .. يابني توكل على الله .. وخد أول خطوة نحو بيت الزوجية السعيد ان شاء الله .. بس ما تنساش تعزمنا في الخطوبة

* أكيد انت أول المعزومين .. بس ما تنساش الجاتوه : )

افترق الصديقان كل إلى حال سبيله .. على أمل اللقاء

31 التعليقات:

Unknown يقول...

سلام عليكم
ألف مبروك ربنا يتمم بخير ان شاء الله
:))
والله الموضوع محير فعلاً بين الأخذ بالأسباب و التوكل على الله والاتنين من الدين
حتى المنطق كمان متعارض بين رأى يقول ازاى تتجوز فى الجو ده و الناس مش قادرة تاخد نفسها فهتضطر تهمل بيتك علشان توفر معيشة كويسة والرأى التانى اللى بيعتمد على استحالة ان الأمور تستقيم لو كل الناس اضربت عن الزواج للسبب الأول
أعتقد ان خليطا من التوكل على الله بعد الأخذ بالأسباب الممكنة كافى بغض النظر عن تدبير أمور المستقبل
تسلم ايدك

mohamed ghalia يقول...

الموضوع فعلا محير الماديات وتعقلها وتتوكل
لكن لازم يكون فى مصدر رزق مش معنى كده انك تشيل هم المستقبل بس على الأقل تتقدم وفى ايدك شغلانة تقدر تاكل منها
بالتوفيق

عالم حبيب يقول...

نسيت أقول حاجة وهو إن الحوار من الخيال .. لكن بكل تأكيد يحدث مثل هذا الحوار كل يوم بين الشباب :)

عالم حبيب يقول...

ـ-ـ- أحمد عبد العدل-ـ-ـ

وعليم السلام ورحمة الله وبركاته

أخي الحبيب أحمد .. اسعدني مرورك جزاك الله خير

كلامك فعلا جميل .. أعجبي منه خصوصاً هذه الفقرة

أعتقد ان خليطا من التوكل على الله بعد الأخذ بالأسباب الممكنة كافى بغض النظر عن تدبير أمور المستقبل

أسعدك الباري : )

عالم حبيب يقول...

mohamed ghalia

حبيبي محمد .. فعلا لازم يكون في توازن وفي الأول والأخير تمتلأ قلوبنا ثقة بما عند الله سبحانه

سعدت بمرورك : )

عاشق الجنة من الإخوان صلى على النبى يقول...

بجد موضوع جميل
النبي صلي الله عليه وسلم قال
ثلاثة حق علي عونهم ومنهم ( والناكح يريد العفاف)
صلي علي النبي

محمد محفوظ يقول...

السلام عليكم...
والله إنت عندك حق... وصدق ربى عز وجل إذ يقول { وأنكحواْ الأيامى منكم والصالحين من عبادكم وإمائكم إن يكونواْ فقراء يغنهم الله من فضله والله واسع عليم }...

واسأل مجرب :))

تحياتى

saadeddine يقول...

ههه قفص.
هل يا ترى سيكون يوم خطبتي بالمريش والميش أم أطرد بقول لا يوجد نصيب إبحث في google عسى أن تجد من تقبل بكوخ والدك.

عمرو جويلى يقول...

عالم حبيب
السلام عليكم
ممكن أن يكون هذا الحوار
بين أى شابين لم يرى كل منهما
الآخر منذ فترة أما عن المقدم
عن الزواج فلابد له أن يعمل
فى وظيفة أو أعمال حرة أو أى
نوع من الأعمال التى تساعده على
المعيشة
خالص تقديرى

dr/shiko يقول...

يارب يسمع من بقك ربنا

( : ريحانة الجنة يقول...

كلاكيييييييييييع
ايوة كلاكيع ولو حديقدر يقول غير كدة اتحداة
لما اهل العروسة يطلبو من العريس مالا يخطر على قلب بشر ويحملوة فوق طاقتة بشوية تحبيكات متحبة اخر تحبيكة من مهر ماقدمهوش علاء الدين فى زمانة ، والا الشبكة بقى ياقوت ومرجان وزمرد ولا على بابا ، الله الله بقى على العفش ولا قصر خامة الخديوولازم الفرح يتعمل فى اجدعها قاعة افراح هى بصراحة بنت الحلال تستاهل هههههه بس مش كدة يعنى

فى ناس بتحبكها بجد وتضيق على العريس لدرجة ان الشاب من الاول لايجرؤ اصلا على خوض هذة التجربة ( اهى التحبيكات دى بقى انا بسميها كلاكيع الجواز)

قال رسول الله صلى الله علية وسلم اذا جاءكم من ترضون دينة وخلقة فزوجوة لم يقل من جاءكم من ترضون مالة ،وظيفتة ،حسبة ، نسبة ،والا تكن فتنة وفساد كبير
ارتضى لنا الخلق والدين صلى الله علية وسلم
وفى كثير من المواقف فى سيرة النبى صلى الله علية وسلم عن هذا منها الرجل الذى تقدم للزواج ولم يكن معة اى شئ سوا ملابسة التى علية وبضع من سور القران يحفظها فزوجة النبى بها
اللهم زوج شباب المسلمين
بارك الله فيك

ربنا يحفظك :) بنت الاسلام

العلم نور يقول...

تفاصيل سيناريوا الحوار ليس جديد فهو مألوف وكأني سمعته من قبل لكن في أرض الواقع وبأسلوب شبه مختلف، لكن أنا معك أنه هناك أشخاص طلعت على المعاش وعلى قولهم (رجل في الدنيا ورجل في الآخرة) وما دخلوش دنيا ويمكن يدخلوا آخرة الله العالم.

كلمات من نور يقول...

سبحان الله داه بقى موضوع الساعة ..أنا عندي اربعة من البنين ..وجعتلي بطني يا بني ..أجوزهم منين دول؟؟؟ بس تعرف ؟ اعرف بنات ، ما شاء الله عليهن ، منذ سنوات أعرفهن عبر المجموعات الإسلامية على الياهوو ..طلباتهن كبيرة قوي قوي وصعبة وتكاد تكون مستحيلة عارف ليه؟؟حاقولك : عايزين شاب يصلي في الصف الأول فروضه الخمس في جماعة ..عايزين شاب لم يعرف حقوقه وواجباته تجاه والديه ..شاب لا يخاف في الله لومة لائم ..شاب يرفعهن إلى الجنة ولا يحطهن في النار ...شاب يقول : ربي الله ويستقيم ..شاب يعرف ويلزم...إيه رأيك يا بني؟؟ربي يوفقهن ويهديكم و يهدينا أجمعين

مهرة سالم يقول...

السلام عليكم...
مبارك للجميع...
والله يسهل الأمور..
سبحان الله تكون الأمور معسره في رأس الشخص ,,,
ولكن ما أن ينوي بصدق ويتوكل على الله حتى تتسهل كل العقبات..
الله يعف بنات وأبناء المسلمين..
...
في امان الله

جلال كمال الجربانى يقول...

السلام عليكم
حوار واقعى فعلاً وليس خيال
ومادار به يدور بالفعل فى رؤوس الشباب
تتصور ان احنا اللى مصعبين الزواج على الشباب
أيوه احنا الشباب والاهل
ليه ميبدأش الشباب بالحد الأدنى
وبعد كده ربنا حيبارك بالتأكيد
والزواج مش صعب ولا حاجه إحنا اللى مصعبينه على نفسنا بس نبعد عن المظاهر والفشخره
قول يارب

ودمت أخى بخير حال

مدونون من اجل الاقصي يقول...

السلام عليكم
بوست جمييييييييييييييييييل
اوي والله
ومؤثر بجد
ربنا يعين الشباب على حالهم
ويرزقهم جميعا بالزوجة الصالحة
وبجد الي ناوي ربنا بيساعدو ويرزقو من حيث لا يحتسب

جنات يقول...

والله الشباب شايفين الجواز رعب ومسؤليه
لكن الله يسهل الامور لكل
شاب يحلم يتجوز ويكمل نص دينه

بالتوفيق لكل شبابنا


بوست رائع وقيم خيووو

ملح الحياة يقول...

السلام عليكم ورحمة الله.
انا من وجهة نظري الشباب لازم يبطلو عزوف عن الزواج بحجج الامور المادية ويتوكلو على الله سبحانه ويحققو العفة لأنفسهم ولغيرهم.
الانسان لازم يسعى في الديا ويبحث عن الرزق ولما يفكر يتجوز يدور على بنت الناس الي ترضى بالقليل واقسم بالله موجودات خلوقات ودينات وجميلات وبنات عائلات وليس هدفهم المادة بل هدفهم التعفف فقط.
موضوع جميل بداية جيدة لتغيير الفكر السائد.والاقدام نحو خطوة جليلة.

عالم حبيب يقول...

عاشق الجنة من الإخوان

صلى الله عليه وسلم .. ربنا يعين الشباب

جزاك الله خيرا

عالم حبيب يقول...

محمد محفوظ

وعليكم السلام ورحمة الله وبركاته

ياليت الجميع يتدبر الآية والواقع ينطق بها

أسعدني مرورك جزاك الله خيرا

عالم حبيب يقول...

saad

: ) رزقك الله الزوجة الصالحة .. وقرأت تدوينتك في نفس الموضوع جميلة ما شاء الله

عالم حبيب يقول...

اللؤلؤة

وعليكم السلام ورحمة الله وبركاته

نعم لابد له من عمل يعينه على الزواج .. لكن تكلمت عن المبالغة والأعباء الإضافية التي تطالب بها أسر كثيرة حتى أصبح الزواج عبء وعقبة يحلم كثير من الشباب أن يتخطاها

عالم حبيب يقول...

dr/shiko

الله يرزقك الزوجة الصالحة وييسر أمورك : )

عالم حبيب يقول...

( : ريحانة الجنة

ياليت البشر يفهمون هذا الكلام : )

عالم حبيب يقول...

الشجرة الأم

الله ييسر على كل من يريد الزواج .. والحوار فعلا واقعي نسمعه يومياً وإن اختلفت الكلمات

عالم حبيب يقول...

كلمات من نور

أولاً يسر الله لأبناؤك ورزقكِ برهم ورزقهم الزوجات الصالحات

لا تحملي الهم فإن الرزق معلوم وسؤ الظن لا ينفع : )

بخصوص الأخوات الذين يطلبون شروط خيالية من الشباب سواء على المستوى الديني أو المستوى الدنيوي وايضا الشباب الذين يطلبون مواصفات خيالية .. فالمطلوب في الشاب والفتاة الحد الأدنى من الإلتزام ثم بعد ذلك يرتقوا معاً

يسر الله أمور الجميع

عالم حبيب يقول...

نهــــــــــار

وعليكم السلام ورحمة الله وبركاته

الله ييسر الأمور للجميع .. وفعلا الله ييسر الأمور خصوصا إذا بدأ الإنسان الخطوات الأولى في طريق الزواج

عالم حبيب يقول...

واحد من العمال

أيوة الحد الأدنى وبعد كدة ربنا بيكرم .. مين اللي يفهم ده بقى : )

عالم حبيب يقول...

مدونون من اجل الاقصي

وعليكم السلام ورحمة الله وبركاته

اللهم آمين ربنا يعين الشباب يارب

عالم حبيب يقول...

جنات

آمين يارب .. ربي ييسر للجميع

عالم حبيب يقول...

ملح الحياة

وعليكم السلام ورحمة الله وبركاته

سبحان الله كم سمعنا وشاهدنا شباب بدأوا بالقليل وأكرمهم الله .. بصدق لابد من الجميع أن يراجعوا الحسابات في موضوع الزواج حتى تحصل العفة للمجتمع والله المستعان